Խուճապի մատնվելու պատճառ չկա, սովորական վիճակ է։ Sputnik Արմենիայի հետ զրույցում, անդրադառնալով հայկական կայքերը կոտրելու մասին տարածված լուրերին, ասաց Մարտիրոսյանը։
«Լուրերը տարածվեցին այն բանից հետո, երբ հայտնի դարձավ, որ կոտրվել է հայտնի հաղորդավարուհի և դերասանուհի Նազենի Հովհաննիսյանի Instagram-ի էջը»,- ասաց փորձագետը` նշելով, որ հիմա ցանցահենները փորձում են օգտատերերի ծածկագրերը ստանալ հենց նրանցից։
«Ամենապրիմիտիվ մեթոդներով կարողանում են կոտրել մարդկանց էջերը։ Օրինակ` օգտատիրոջը նամակ են ուղարկում, որում ասված է, որ Instagram-ը որոշել է իրենց տրամադրել երկնագույն նշան, այսինքն`որ նա ստուգված պրոֆիլ է ստացել։ Ակտիվացնելու համար առաջարկում են մտնել ինչ-որ էջ և գրանցվել։ Արդյունքում օգտատերն ինքն իր ձեռքով ցանցահեններին է հանձնում իր պրոֆիլի ծածկագիրը»,- ասաց Մարտիրոսյանը` հորդորելով ուշադիր լինել ու մինչև լրացնելը կարդալ, թե ինչ են լրացնում։
Ինչ վերաբերում է հայկական պաշտոնական կամ լրատվական կայքերը կոտրելուն, Մարտիրոսյանը նշեց, որ նման տեղեկատվություն չկա։ Հիմնականում թիրախավորվել են շոու բիզնեսի ներկայացուցիչների էջերը։
Սամվել Մարտիրոսյանի տվյալներով` ամսվա ընթացքում հայկական կայքէջերը մի քանի տասնյակից մինչև մի քանի հարյուր հարձակումների են ենթարկվում։