Sputnik Արմենիայի հետ զրույցում ֆոտոլրագրող Գագիկ Շամշյանը պատմել է, որ ապրիլյան քառօրյա պատերազմից առաջ զինվորի արիության մասին շատ քիչ բան է իմացել։
«Այնտեղ ականատես եմ եղել, թե ինչպես են մեր առյուծ տղաները սպաների հետ արժանի հակահարված տվել ադրբեջանցիներին։ Ցավոք, մենք ունեցանք զոհեր, ունեցանք վիրավորներ ու երբ կարդացի, որ իմ սիրելի դերասան Հրանտ Թոխատյանն ու բազմաթիվ մարդիկ արձագանքել են նախարարի կոչին, ես էլ որոշեցի միանալ։ Այդ գումարը` 1000 դոլարը, ԱՄՆ-ում հրատարակվող իմ նյութերի այս ամսվա գումարն է»,- ասել է Շամշյանը։
Պաշտպանության նախարար Վիգեն Սարգսյանը կոչ է արել վիրավոր զինծառայող Ալբերտ Դալլաքյանի անհրաժեշտ վիրահատությունը Գերմանիայում կազմակերպելու համար հանգանակություն կազմակերպել։ Վիգեն Սարգսյանը հայտարարել էր, որ զինվորի բուժման համար անհրաժեշտ է 46 000 դոլար, որի 10%-ը կտրամադրեն ինքն ու իր ընկերները:
Ալբերտ Դալլաքյանին կարող եք օգնել այս հղումով։