ԵՐԵՎԱՆ, 15 հունվարի — Sputnik. Հունվարի 20-ին ջերմաստիճանը Հայաստանում կտրուկ կբարձրանա ևս մի քանի աստիճանով։ Այս մասին Sputnik Արմենիայի հետ զրույցում ասաց ՀՀ ԱԻՆ հիդրոմետ ծառայության օդերևւութաբանության կենտրոնի պետ Գագիկ Սուրենյանը։
«Այս ջերմաստիճանը մոտ է մեր` երբևիցե դիտված առավելագույն ջերմաստիճանին։ Դա այն բացարձակ շեմն է, որին հասնում է ջերմաստիճանը։ Դրանից տաք լինել չի կարող տարվա այս ժամանակահատվածում»,- ասաց Սուրենյանը։
Ի դեպ, նրա խոսքով, նման ջերմաստիճան Հայաստանում գրանցվել է միայն 1963-66թթ-ին։ Որպես կանոն` 0-ից 11-12 աստիճան բարձր ջերմությունը երևանյան հունվարի առավելագույն շեմն է։ Հունվարի 20-ի ցերեկը մայրաքաղաքում կանխատեսվում է 10-12, գիշերը` 3-5 աստիճան տաքություն։
Անսովոր տաք ձմեռ է նաև հանրապետության այլ հատվածներում։
«Ամեն մի տարածաշրջանի համար կլիմայական նորմայից շեղում կլինի 8-10 աստիճանով»,-ասաց Սուրենյանը` նշելով, որ Սյունիքի հովիտներում ջերմաստիճանը հունվարի 20-ին ու հաջորդող օրերին կհասնի 17 աստիճանի։
Ու թեև «Հիդրոմետը» հունվարի 20-ից հետո եղանակի մասին պաշտոնական տվյալներ առայժմ չի հրապարակել, բայց Գագիկ Սուրենյանը հայտնեց, որ եղանակը դրանից հետո էլ կշարունակի տաք մնալ։
«Հետագա օրերի կանխատեսումը դեռ հստակ չէ, բայց մոտավորապես կպահպանվի նման ջերմային ֆոնը, տաք է լինելու»,- վստահեցրեց նա։
Ինչ վերաբերում է անոմալ տաք եղանակի` բնության համար վտանգավոր լինելուն, ՀՀ գյուղնախարարությունից Sputnik Արմենիային հայտնեցին, որ այս պահին վտանգ չկա։ Հնարավոր վտանգը պարզ կլինի ավելի ուշ, երբ տաք եղանակը կպահպանվի տևական ժամանակ։