ԵՐԵՎԱՆ, 13 հունվարի — Sputnik. Եթե «Արսենալի» մարզիչ Արսեն Վենգերը ձեռքը դնի Մխիթարյանին ուսին ու նրա շուրջ կառուցի խաղը, ինչ-որ բան կարող է ստացվել։ Sky Sports-ին տված հարցազրույցում նման կարծիք է հայտնել Տոտենհեմի» և «Աստոն Վիլլայի» նախկին մարզիչ Թիմ Շերվուդը։ Այս մասին հայտնում է Daily Express-ը։
Նա կարծում է, որ Մխիթարյանը կարող է համարժեք փոխարինող լինել Ալեքսիս Սանչեսին «Մանչեսթեր Յունայթեդի» և «Արսենալի» միջև փոխատեղում անելու դեպքում։
Դժվար է Մխիթարյանի դատել մանչեսթերյան խաղով։ «Բայց եթե հիշենք, թե նա ինչ էր անում «Շախտյորում» և «Բորուսիայում», ապա կտեսնենք, որ մեր դիմաց համաշխարհային մակարդակի խաղացող է»,- ասել է նախկին մարզիչը։
«Նա պարզապես ինքնավստահության պակաս ունի։ Եթե Վենգերը ձեռքը դնի նրա ուսին, ապա անպայման ինչ-որ բան կստացվի։ Նա լավ խաղացող է»,- շեշտել է Շերվուդը։
Երկու օր առաջ Daily Star-ը ներկայացրել էր ֆուտբոլային հայտնի փորձագետ Ջանլուկա դի Մարցիոյի հայտարարությունը։ Նրա խոսքով` Մոուրինյոն արդեն զանգել է Վենգերին ու նրա հետ քննարկել Մխիթարյանի ու Սանչեսի փոխանակման հարցը։ Վենգերը հայ ֆուտբոլիստի երկրպագուն է։