ԵՐԵՎԱՆ, 10 հունվարի — Sputnik. Իրանի իրադարձությունները «գունավոր հեղափոխության» փորձ էին, այսօր լրագրողներին ասաց «Նորավանք» գիտակրթական հիմնադրամի գործադիր տնօրեն, քաղաքագետ Գագիկ Հարությունյանը, հայտնում է Sputnik Արմենիայի թղթակիցը։
«Դա «գունավոր հեղափոխության» փորձ էր Իրանում, որտեղ միանշանակ տնտեսական ու քաղաքական խնդիրներ կան։ Բայց դա երկրորդական է։ Պետք է հասկանալ, որ Մեծ Մերձավոր Արևելքում լիբերալ գաղափարները ներդնելու ուժային փորձերը աղետով են ավարտվել», – ասաց Հարությունյանը։
Այնուամենայնիվ, Գագիկ Հարությունյանը նշեց, որ Իրանի ռազմաքաղաքական համակարգը առանձնանում է իր ամրությամբ. դժվար թե այնտեղ փողոցային բողոքների միջոցով հնարավոր լինի հեղափոխություն անել։
«Նրանք շատ շուտ դադարեցրեցին այդ ամենը. շատ մարդ ձերբակալեցին, հետո որոշակի երաշխիքների պայմանով ազատ արձակեցին», – ասաց Հարությունյանը։
Նա ուշադրություն է դարձնում նաև այն բանին, որ իրանական իշխանությունները քրդական ինքնավարության ազդեցությունը բողոքի ակցիաների կատալիզատոր են համարում։ Հարությունյանը կարծում է, որ 2018 թվականին քրդական գործոնը ավելի մեծ նշանակություն է ստանալու։
Այդ պատճառով է Թուրքիան որոշել Իրանի հետ պատ կառուցել հենց այն հատվածում, որտեղ ապրում են քրդերը։
«Մենք տեսնում ենք Մերձավոր արևելքում որոշակի քաոսը վերականգնելու փորձեր, այդ թվում` քրդական գործոնի միջոցով», – ասաց Հարությունյանը։
Նրա կարծիքով` ապակայունացմանն ուղղված ևս մի քայլ էր ԱՄՆ–ի որոշումը` Իսրայելում դեսպանատունը Թել Ավիվից Երուսաղեմ տեղափոխելու մասին։
Իշխանությունները ճնշել էին դեկտեմբերի վերջին Իրանում տեղի ունեցած ու մի քանի օր տևած բողոքի ակցիաները։ Պաշտոնական Թեհրանը մեղադրել է արտաքին ուժերին` երկրի վիճակն ապակայունացնելու համար։
Արդյունքում, բողոքի ակցիաները հետ են մղվել, մոտ 3,7 հազար մարդ է ձերբակալվել։