ԵՐԵՎԱՆ, 10 հունվարի — Sputnik. Արցախում լայնածավալ ռազմական գործողություններ չեն լինի, այսօր լրագրողներին ասաց «Նորավանք» գիտակրթական հիմնադրամի տնօրեն, քաղաքագետ Գագիկ Հարությունյանը։
«Հայաստանի միջազգային դիրքերը, ի տարբերություն Ադրբեջանի, մի քիչ բարելավվել են։ Մասնավորապես, շատ կարևոր էր Եվրամիության հետ պայմանագրի ստորագրումը», – ասաց Հարությունյանը։
Նրա խոսքով` Արևմուտքում մեկուսացման գործընթացները (Brexit, ԱՄՆ–ի և եվրոպական երկրների միջև հակասությունները) նպաստում են Հարավային Կովկասում ստատուս քվոյի պահպանմանը։
«Ես հեռու եմ այն կարծիքից, որ Արցախի հարցում կարող է ինչ-որ առաջընթաց լինել, բայց չեմ կարծում, որ կարող են վերսկսվել լայնածավալ ռազմական գործողություններ, ինչպես դա եղել է 2016թ–ին», – ասաց Հարությունյանը։
Քաղաքագետը չի կարծում, որ Ադրբեջանում կայանալիք ընտրությունների ֆոնին (2018թ–ի հոկտեմբերի 17) պաշտոնական Բաքուն կգնա հակամարտության թեժացման ։
«Հայաստանի համար բարենպաստ արտաքին քաղաքական իրավիճակից բացի, զգալիորեն բարձրացել են ագրեսիային պատասխան տալու հայկական բանակի հնարավորությունները», – նշեց Հարությունյանը։
Նա ասաց, որ իրեն ուրախացնում և ոգեշնչում է հայկական ռազմաարդյունաբերական համալիրի վերածնունդը և զարգացումը։
«Որքան գիտեմ (ինձ թվում է` ես այդ մասին ինչ-որ բան գիտեմ), այստեղ մեր հնարավորությունները զգալիորեն բարձրացել են», – ասաց քաղաքագետը։