«Ճվճըվ Արոյի» որդին ներկայացել է ոստիկանություն. հարուցվել է քրեական գործ

ԵՐԵՎԱՆ, 8 հունվարի — Sputnik. ՀՀ քննչական կոմիտեի Երևան քաղաքի քննչական վարչությունում հարուցվել է քրեական գործ՝ 2018 թվականի հունվարի 8-ին Երևանում տեղի ունեցած մեկ անձի մահվան պատճառ դարձած ավտովթարի դեպքի առթիվ։

Այս մասին տեղեկացնում է ՀՀ քննչական կոմիտեի մամուլի ծառայությունը։

Ողբերգական ավտովթար Երևանի կենտրոնում. «Ճվճըվ Արոյի» որդին փախել է, ոստիկանը` մահացել

8 հունվարի 2018, 09:21

Ինչպես արդեն տեղեկացրել էինք`հունվարի 8-ին, ժամը 04:40-ի սահմաններում, Երևան քաղաքի Սայաթ-Նովա պողոտայի և Աբովյան փողոցի խաչմերուկում «ԲՄՎX6» մակնիշի, 35 NT 388 հաշվառման համարանիշի ավտոմեքենան հարվածել է «Տոյոտա» մակնիշի, 243 II 02 հաշվառման համարանիշի ավտոմեքենային։ Վերջինը ՃՈ 1–ին սպայական գումարտակի 6–րդ դասակի պարեկային մեքենային։ Վթարի հետևանքով ճանապարհային ոստիկանության տեսուչ, 29–ամյա Արեգ Դավթյանը հիվանդանոցի ճանապարհին մահացել է, իսկ 34–ամյա Խաչիկ Գասպարյանը տարբեր վնասվածքներով տեղափոխվել է հիվանդանոց։ Վթարից հետո «ԲՄՎX6» մակնիշի ավտոմեքենան դուրս է եկել երթևեկելի գոտուց և հարվածել գովազդային վահանակին:

Մարմնական վնասվածքներ են ստացել նաև «ԲՄՎX6» մակնիշի ավտոմեքենայի 2 ուղևորները։

Ավտովթարից հետո «ԲՄՎX6» մակնիշի ավտոմեքենայի վարորդը, թողնելով ճանապարհատրանսպորտային պատահարի վայրը, փախել է:

Ոստիկանության նախնական տվյալներով` նախնական տվյալներով «ԲՄՎX6»–ը վարել է 26–ամյա Սարգիս Վարդանյանը։

Դեպքի առթիվ Երևան քաղաքի քննչական վարչությունում հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով, կատարվում է նախաքննություն:

Ըստ մամուլում շրջանառվող տեղեկությունների` BMW X 6-ը վարել է հանրությանը հայտնի, բազմաթիվ ավտովթարների հեղինակ, քրեական պատմություններով հարուստ, նախկինում դատապարտված «Ճվճվ Արոյի» որդին՝ «Սաքուլիկ» մականվամբ Սարգիս Վարդանյանը:

Մահացած Արեգ Դավթյանն ու վիրավոր Խաչիկ Գասպարյանը ծառայության մեջ են եղել. նրանք աշխատում էին ՃՈ 1-ին սպայական գումարտակում: