2017թ-ի վերջին մի քանի ամիսներին ԼՂ սահմանին հարաբերական հանգիստ է եղել։ Sputnik Արմենիայի հետ զրույցում ասաց քաղաքագետ Հրանտ Մելիք-Շահնազարյանը։
«Հիմնական պատճառը Ալիևի դիրքերի թուլացումն է, որը նրան ստիպում է ինչ-որ չափով հրաժարվել ագրեսիվությունից, գնալ որոշակի զիջումների»,- ասաց Մելիք-Շահնազարյանը` միաժամանակ ավելացնելով, որ ոչ փոքր դերակատարություն է ունեցել նաև սահմանի ռազմական կահավորանքի արդիականացնումը։
«Նորացվել են և՛ դիտարկման համակարգերը, և՛ թշնամու դիվերսիոն խմբերի բացահայտման համար նախատեսված համակարգերը, և՛ էլեկտրոնային վերահսկման համակարգերը։ Դրանք բոլորը թարմացվել են, և 2018թ-ին այդ գործը շարունակվելու է»,- նշեց քաղաքագետը։
Եթե այս իրավիճակում Ադրբեջանի նկատմամբ միջնորդները մի փոքր ավելի ճնշում գործադրեն, քաղաքագետը չի բացառում, որ լարվածությունը սահմանին էլ ավելի կթուլանա։