Արամ Գարեգինյան, Sputnik
2018 թվականից մենք կրկնակի սանդղակով ենք եկամտահարկ վճարելու։ Լուրերը մեզ բերել է Հարկային օրենսգիրքը, որն ուժի մեջ է մտել հունվարի 1-ից։
Օրենսդրության հիմնական տրամաբանությունը հետևյալն է․փոքր-ինչ հավասարեցնել հարուստների ու աղքատների հարկերը։ «Փոքր-ինչ», քանի որ բուրժուաներին խփելու մասին կարգախոսներին իշխանությունը պատասխանում է․«Բարձր աշխատավարձերն այդ դեպքում պարզապես կթաքցվեն»։ Այդ պատճառով, երկու միլիոնից ավել ստացողների հարկն, ինչպես և նախկինում, 36% կկազմի։
Իսկ ցածր աշխատավարձ ստացողներն ավելի քիչ կվճարեն։ Եթե նախկինում 120 հազար դրամ աշխատավարձից 24,4% էինք վճարում, ապա նոր տարուց 23% կվճարենք։ Եվ այդ հարկը կգործի ոչ թե մինչև 120, այլ 150 հազարը։ Այդ կետից սկսած ու մինչև երկու միլիոն հարկը 28% կկազմի՝ նախկին 26%-ի փոխարեն։
Այստեղ պետք է հիշել՝ հարկի սանդղակը գործում է ոչ թե ամբողջ աշխատավարձի, այլ միայն համապատասխան հատվածի վրա։ Այսինքն՝ եթե դուք 250 հազար դրամ եք ստանում, ապա «ներքին» 150 հազարից 23% եք վճարում, ու միայն «վերին» 100 հազարից՝ 28%։
Դրա համար մեր եկամտային «բրդուճում» միանգամից մի քանի «բաղադրիչ» է փոխվում։
Եթե հիմա միջին աշխատավարձը հանրապետությունում 187 հազար դրամ է կազմում, ապա դրանից 1840 դրամ ավելի քիչ է պետք վճարել։ Արդյունքում՝ ամսական կտրվածքով կարելի է գործընկերների հետ մեկ անգամ ճաշելու փող «հետ գցել»։
Ճիշտ է` պաշտոնական վիճակագրությունը մի փոքր տարբերվում է իրականությունից, քանի որ այն չի գրանցում ստվերային զբաղվածությունը։ Դրա համար վաճառողուհիները կամ գազալցակայանների աշխատակիցները, որոնք օրական 3-4 հազար դրամ են ստանում, վիճակագրության մեջ չեն արտացոլվում։ Գործատուն նրանց համար օրինական հարկեր չի մուծում, դրա համար էլ նրանք «ճաշը» չեն ստանա։