ԵՐԵՎԱՆ, 3 հունվարի — Sputnik. Հայաստան ներկրվող մեքենաների ավելի քան 80 տոկոսը յոթ տարեկանից մեծ են։ Նոր ավտոմեքենա կարող են գնել միայն ունևորները։ Հիմնականում հայ ավտոմոբիլիստները մեքենաներ են գնում 4-5 հազար դոլարի սահմանում և ոչ թե ավտոսրահներից, այլ անհատ դիլերներից։ Տևական ժամանակ է` այդպես է։
2017թ-ի առաջին կիսամյակում մեքենաների ներկրման միջին գինն ավելի է նվազել։ Պետեկամուտների կոմիտեի տվյալներով՝ մեկ ներկրվող մեքենայի միջին գինը 5 հազար դոլարից նվազել է մինչև 3,6 հազար։ Այդ ամիսներին կտրուկ աճել է Ճապոնիայից ներկրվող մեքենաների թիվը (այդ թվում՝ էժան աջ ղեկով մեքենաների)։
Հայաստանում պատրաստվում են արգելել այդ աջ ղեկով ավտոմեքենաները, ինչի մասին մենք արդեն գրել ենք։ Ինչպես հայտարարում են իշխանությունները, նման մեքենաների վտանգավորության աստիճանը մեծ է (այդ մասին պաշտոնական վիճակագրություն առայժմ չկա)։ Քննարկումները դեռ չեն ավարտվել, բայց Հայաստանում ակնհայտորեն պատրաստ չեն հրաժեշտ տալ էժան մեքենաներին։
Ցանկացած փոփոխություն, որից «հոտ է գալիս», կասկածով է ընդունվում։ Այդպես եղավ, երբ Հայաստանը մտել է Եվրասիական միություն, և շատերը մտավախություն ունեին, որ այլևս հնարավոր չի լինի էժան մեքենաներ ներկրել ԱՄԷ-ից և Վրաստանից։
Բայց ավտոմեքենաների մաքսատուրքերի հարցում Հայաստանը մինչև 2020թ-ն ազատված է միասնական եվրասիական տուրքերից։ Ինչպիսի՞ն կլինեն դրանք ապագայում։ Եվ ի՞նչ կլինի, եթե արգելեն նաև աջ ղեկով մեքենաները։ Այս հարցերին առայժմ ոչ ոք պատասխան չի տվել։
Սա դեռ ամբողջ դժբախտությունը չէ։ Իսկ ի՞նչ կփոխվի մեր մաքսավորների գլխում, որոնք փոխում են մեքենաների մաքսազերծման հսկիչ գները։ Այդ հարցը պակաս կարևոր չէ, քան մաքսատուրքերը։ Բայց մաքսավորների մտքերն անքննելի են։