Լաուրա Սարգսյան, Sputnik
Արաքսյա Հակոբյանի ու Վալերիան Թորոսյանի սիրո պատմությունը սկսվեց երկու տարի առաջ Երևանի N1 տուն-ինտերնատում։ Վալերիանն արդեն մեկ տարի բնակվում էր այնտեղ, երբ եկավ Արաքսյան։
«Ինչպես ինձ, այնպես էլ Արաքսյային տեղավորեցին վեց բնակիչ ունեցող սենյակում։ Մեր սենյակներն իրար հարևանությամբ էին։ Երկուսիս համար էլ սենյակում մնալը երբեմն հոգնեցուցիչ էր դառնում և դուրս էինք գալիս միջանցք։ Այդպես սկսեցինք ընկերություն անել, իրար հետ ժամադրվել»,- պատմում է Վալերիան պապը։
Ժամադրությունների ժամանակ պարզեցին, որ ընդհանուր շատ բան ունեն, բնավորություններն էլ շատ են նման։ Արաքսյան երբեք ամուսնացած չէր եղել, ամբողջ կյանքը նվիրել էր ծնողների խնամքին ու աշխատանքին։ Վալերիան պապի կինն էլ քաղցկեղից մահացել էր 2005 թվականին, ու չնայած այն փաստին, որ երկու տղա, թոռներ ու ծոռներ ուներ, որոշել էր առանձին ապրել։ Հաճախակի հանդիպումներն ու սրտաբաց զրույցները հետզհետե ավելի մտերմացրին Վալերիանին ու Արաքսյային։ Նրանք սկսեցին իրար հետ կիսել ունեցածը` կոնֆետը, թեյը, ուտելիքն ու ապրումները։
«Հասկացա, որ ջահելի պես սիրահարվել եմ։ Մոտեցա նրան, բռնեցի ձեռքը և առաջարկեցի ամուսնանալ։ Ասացի, որ եթե ինձ հետ ամուսնանաս, վերջապես կհասկանաս` ինչ բան է ամուսնությունը, իսկ ես էլ կին կունենամ»,- պատմում է պապը։
Ասում է` ինքն իր վրա զարմացավ. չէր հավատում, որ 70 տարեկանից հետո կյանք կա, և որ հնարավոր է այսպես սիրահարվել։ Արաքսյա տատն էլ իսկույն համաձայնություն տվեց, հետո ամուսնության մասին պատմեց զարմիկներին, Վալերիան պապն էլ` որդիներին։ Ընտանեկան խորհուրդը հավաքվեց օգոստոսի 2-ին` պապի ծննդյան օրը։ Հարազատներն ու բարեկամները ծանոթացան ու հավանություն տվեցին սիրահարների ընտրությանը։
«Որդիներիս ասացի` միայնակ լինելը դժվար է, նրանք էլ ըմբռնումով մոտեցան իմ որոշմանը»,- ասում է պապը։
Զույգի պսակադրության արարողությունը կայացավ հոկտեմբերի 2-ին։ Հարսանիքն անցավ հայկական բոլոր ավանդույթներով` երգ, պար, պսակադրություն, ամուսնության գրանցում։ Հյուրերի թվում էլ Հայաստանի առաջին տիկինն էր` Ռիտա Սարգսյանը, որի բերած հարսանեկան նվերը` ոսկյա մատանին, Արաքսյա տատը խնամքով է պահում։
Հարսի ու փեսայի կերպարներն ամբողջական դարձրին ոճաբանները. Արաքսյա տատը հագավ ճերմակ ճոխ զգեստը, Վալերիան պապը` սպիտակ վերնաշապիկի վրայից կապեց փողկապն ու հագավ սև կոստյումը։
Տուն–ինտերնատում նրանց առանձին սենյակ հատկացրին` կահույքով, սառնարանով ու հեռուստացույցով։ Ճիշտ է` նոր չեն, բայց նորապսակների համար ոչ թե սառնարանի նոր ու հինն է կարևոր, այլ իրար գտնելն ու կյանքի հետագա տարիները միասին անցկացնելը։