Լիլիթ Հարությունյան, Sputnik.
Այսօր քիչ թե շատ հեղինակավոր յուրաքանչյուր նորաձևության տուն փորձում է հետևել սեփական կոնցեպտին և միտումներին:
Դիզայներներն ամեն կերպ համադրում են տարբեր տիպի գործվածքներ: Գունային լուծումների հարցում նկարիչ-դիզայներների երևակայությունը սահմաններ չունի: Շատ պահանջված կլինեն ասեղնագործ հագուստները, այդ թվում ասեղնագործություն կարող է լինել ինչպես ամենօրյա բլուզների, այնպես էլ վերնաշապիկների և անդրավարտիքների վրա: Իրենց արդիականությունը չեն կորցնում նաև երկրաչափական նախշերը, ինչպես նաև դրանց քաոսային համադրությունները:
Sputnik Արմենիայի հետ զրույցում հայտնի դիզայներ Լիանա Elsi Սարգսյանը նշեց, որ 2018 թվականի թրենդներն ընդհանուր առմամբ բավական տարբեր են լինելու:
«Թե կոնկերտ ինչ գույներ և ձևեր նորաձև կլինեն գալիք տարում, հաստատ ասել չի կարելի: Յուրաքանչյուր նորաձևության տուն առաջարկում է իր գաղափարները: Աշխարհում մի քանի նորաձևության տներ կան, որոնք թելադրում են նորաձև միտումներ, սակայն դրանք խիստ տարբերվում մեկը մյուսից: Ընդհանուր առմամբ, կարելի է ասել, որ պրետ-ա-պորտե հագուստներն ավելի շատ ձգտում են 70-ականների ոճին: Միևնույն ժամանակ երեկոյան զգեստները որոշակի առումով վերադարձնում են 18-րդ դարի նորաձև միտումները, իհարկե՝ նոր լուծումներով՝ գիպյուրի, ժանյակների, ծոպերերի կիրառմամբ», — նշեց դիզայները:
Նրա խոսքով` ծոպերը, փետուրներն ու ամեն տեսակ տպագրությունները ս ևնորաձև կլինեն 2018 թվականին:
«Առավել արդիական այս տարի կլինեն թափանցիկ, ինչպես նաև կաշվից և լաքից թիկնոցները: Ընդ որում, նախապատվություն կտրվի կարմիր և դեղին գույներին, ինչպես նաև տարբեր տպագրությունների: Շատ պահանջված կլինեն նաև օրիգինալ դիզայներական լուծումներով գործած պիջակներն ու ժակետները», — ավելացրեց Լիանան:
Elsi-ն նորաձևությանը հետևող կանանց և տղամարդկանց խորհուրդ տվեց ինքնատիպ լինել և փորձել նորաձևության միտումներից ընտրել հենց այն, ինչն առավել ճշգրիտ է արտացոլում անհատականությունը: