«Մահից չեմ վախենում». ԱԳՆ խոսնակը մեկնաբանել է Euronews-ի ռեպորտաժը հիվանդ արցախցու մասին
© Sputnik / Sara Galstyan
Բաժանորդագրվել
Հայաստանի ԱԳՆ մամուլի խոսնակը մեկնաբանել է ռեպորտաժը, որը Երևանում բուժում ստացող ստեփանակերտցի օնկոլոգիական հիվանդի մասին է:
ԵՐԵՎԱՆ, 5 օգոստոսի – Sputnik. Լեռնային Ղարաբաղի անմարդկային շրջափակումն անդառնալի վնաս է հասցնում բնակչությանը։Twitter-ում այս մասին գրել է ՀՀ ԱԳՆ մամուլի քարտուղար Անի Բադալյանը և վերահրապարակել Euronews-ի ռեպորտաժը, որը պատմում է քաղցկեղով հիվանդ Ստեփանակերտի բնակիչ Վաչիկ Բաբաջանյանի մասին, որը բուժվում է Երևանում։
«Ադրբեջանի կողմից Լաչինի միջանցքի և Լեռնային Ղարաբաղի ապօրինի և անմարդկային շրջափակումը անդառնալի վնաս են հասցնում Լեռնային Ղարաբաղի բնակչությանը։ Այս ամենի հետևում կանգնած է 120 հազար մարդու իրական պատմություններ, ինչպիսին սա է։ Այս մարդկանցից յուրաքանչյուրը տառապում է հայրենիքից, ընտանիքից ու իր սիրած մարդկանցից զրկվելու ցավից», - գրել է Բադալյանը։
Euronews-ի ռեպորտաժում Ստեփանակերտի` քաղցկեղով հիվանդ բնակիչն ասում է, որ ինքը չի մտածում իր հիվանդության մասին, ինքը չի վախենում մահից: Վախենում է կարոտել իր տունը։
Illegal closing of #LachinCorridor &inhuman blockade of #NagornoKarabakh by Azerbaijan is causing irreversible harm to NK people.
— Ani Badalyan, Spokesperson of MFA of Armenia (@ArmSpoxMFA) August 5, 2023
And behind it there are 120K real human stories like this, each of them suffering from pain to be deprived of homeland, family, from what they love. https://t.co/B54qbJ7xkr
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին ավելի քան 225 օր շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։
