ԵՐԵՎԱՆ, 24 հունիսի – Sputnik. ՀՀ «Սեյսմիկ պաշտպանության տարածքային ծառայություն» պետական ոչ առևտրային կազմակերպությունը չի լուծարվի։ Նման որոշում է ընդունվել այսօր կառավարության հերթական նիստում։
Նոր որոշմամբ գործադիրն ուժը կորցրած է ճանաչել մեկ տարի առաջ` 2020 թվականի հունիսի 18-ին իր իսկ ընդունած որոշումը` ՍՊԱԾ–ը լուծարելու մասին։ Նախորդ որոշմամբ` ՍԱՊԾ–ն ՊՈԱԿ–ից պետք է վերածվեր ԱԻՆ–ի վարչության։
Կառավարությունում, սակայն, արձանագրում են, որ ՀՀ ԱԻՆ կառուցվածքում վարչության կարգավիճակի դեպքում ՍԱՊԾ–ն չի կարող ունենալ առանձին կառուցվածքային ստորաբաժանումներ, ինչի արդյունքում սեյսմիկ պաշտպանության ոլորտի գործառույթները չեն կարող լիարժեք և օպերատիվ իրականացվել, ինչը կարևոր է ՀՀ համար, քանի որ այն գտնվում է սեյսմոակտիվ գոտում, և նրա մեծ մասում առկա է բարձր սեյսմիկ վտանգ և ռիսկ:
«ՀՀ ԱԻՆ Սեյսմիկ պաշտպանության ծառայության կառուցվածքի լավագույն ձևը մնում է պետական ոչ առևտրային կազմակերպությունը՝ ի դեմս տարիներ շարունակ հաջողությամբ գործող «Սեյսմիկ պաշտպանության տարածքային ծառայություն» ՊՈԱԿ-ի»,– ասված է կառավարության որոշման հիմնավորման մեջ։
Անհանգստանա՞լ, թե՞ ոչ. ՀՀ գլխավոր սեյսմոլոգը՝ տարածաշրջանում սեյսմիկ անվտանգության մասին
Նշենք, որ ՍԱՊԾ–ը ստեղծվել է 1991 թվականին` որպես կառավարությանն առընթեր ծառայություն: 2003 թվականին այն վերակազմավորվել է ԱԻՆ «Սեյսմիկ պաշտպանության արևմտյան ծառայություն» պետական ոչ առևտրային կազմակերպության:
ՊՈԱԿ-ն իր կազմում ունի ստորաբաժանումներ՝ 52 դիտակայաններ, որոնք համալրված են 153 սարքավորումներով և մարզային կառույցներ` Գառնիում, Գյումրիում ու Կապանում:
