ԵՐԵՎԱՆ, 12 հունվարի – Sputnik. Արցախի կառավարությունը սկսում է տեղահանված ընտանիքներին բնակելի տներով ապահովելու ծրագրի առաջին փուլը։ Այս մասին ֆեյսբուքյան էջում հայտնում է ԱՀ աշխատանքի, սոցիալական և միգրացիայի հարցերի նախարար Մանե Թանդիլյանը։
«Բնակելի տները տրամադրվելու են Ասկերանի, Մարտունու, Մարտակերտի և Շուշիի շրջաններում գտնվող գյուղական համայքներում։ Տները կլինեն վերանորոգված և կահավորված։ Նախատեսվում է ապահովել նաև գյուղատնտեսությամբ զբաղվելու հնարավորություն և միջոցներ՝ ըստ ընտանիքի նախապատվության»,–նշել է Թանդիլյանը։
Նրա խոսքով`բնակելի տների տրամադրումը կիրականացվի առաջիկա ամիսների ընթացքում։
Դիմումները կարող են ներկայացնել նախարարություն՝ պարտադիր նշելով կոնտակտային տվյալներ (հեռախոսահամար, բնակության փաստացի վայր, անուն, ազգանուն): Որպես դիմումի վերնագիր պետք է գրել՝ «Բնակելի տան դիմում», նշելով հետևյալ տեղեկությունները՝
• ընտանիքի անդամների քանակը, կազմը,
• ընտանիքի անդամները՝ անուն, ազգանուն, անձնագրի կամ ծննդյան վկայականի տվյալները, սոցիալական քարտի համարը (ՀԾՀ)
• նշված շրջաններից նախապատվելի վարչական շրջանը
• այլ տեղեկություն
Պատերազմի հետևանքով Արցախը 112,5 մեգավատ տրվածքային հզորությամբ ՀԷԿ-եր է կորցրել
Դիմումները կարող են ուղարկել փոստով` ք. Ստեփանակերտ, Ազատամարտիկների 54 հասցեով կամ էլ․փոստով՝ mss.nkr@mail.ru, կամ նախարարության ֆեյսբուքյան պաշտոնական էջին։
