ԵՐԵՎԱՆ, 9 նոյեմբերի — Sputnik. Հայաստանի երկրորդ նախագահ Ռոբերտ Քոչարյանի փաստաբան Հովհաննես Խուդոյանը մեկնաբանել է գործը Վերաքննիչ դատարան վերադարձնելու հնարավորությունը։
«Ժողովուրդ» թերթն այսօրվա համարում գրել էր, որ Վճռաբեկ դատարանի դատավորները գտել են իրավիճակից դուրս գալու առավել ընդունելի տարբերակ. նրանք կարծում են` ճիշտ կլինի Ռոբերտ Քոչարյանի մասով ՀՀ վերաքննիչ քրեական դատարանի որոշումը բեկանել և այն ուղարկել կրկին ՀՀ քրեական վերաքննիչ դատարան նոր քննության: Բանն այն է, որ ուսումնասիրելով գործը` ՀՀ վճռաբեկ դատարանում արձանագրել են, որ ՀՀ քրեական վերաքննիչ դատարանի դատավորը Ռոբերտ Քոչարյանի կալանավորման հարցը քննելիս ընդամենը մեկ հանգամանք է հաշվի առել, իսկ մյուս հանգամանքների վրա ուշադրություն չի դարձրել:
Քոչարյանի փաստաբան Հովհաննես Խուդոյանը Sputnik Արմենիայի հետ զրույցում նշեց, որ գործը կարող է վերադառնալ Վերաքննիչ դատարան միայն այն դեպքում, եթե Վճռաբեկ դատարանը բավարարի կողմերից մեկի` գլխավոր դատախազության կամ նախկին նախագահի պաշտպանական կողմի բողոքը։
«Վճռաբեկ դատարանն այսպես թե այնպես պետք է քննի գործը, բավարարի կողմերից մեկի բողոքը և միայն հետո համապատասխան որոշում կայացնի», – նշեց նա։
Տվյալ պահին այդ մասին ինչ–որ տեղեկություն չկա։ Պաշտպանական կողմն առաջվա պես կարծում է, որ իրենց բողոքը հիմնավորված է։
