ԵՐԵՎԱՆ, 30 օգոստոսի — Sputnik. Ռուսաստանի ԱԳՆ պաշտոնական ներկայացուցիչ Մարիա Զախարովան մեկնաբանել է Գերմանիայի կանցլեր Անգելա Մերկելի հայտարարությունն այն մասին, որ Բեռլինը պատրաստ է նպաստել ղարաբաղյան հակամարտության կարգավորմանը։
Ավանդական ճեպազրույցի ընթացքում Զախարովան նշել է, որ այդ հարցը պետք է լուծեն կարգավորման գործընթացում անմիջականորեն ներառված երկրները։
«Ու այդ ամենը պետք է արվի առկա ձևաչափերի աշխատանքի արդյունավետությունը հասկանալով։ Նման հայտարարությունները պետք է դիտարկել այդ գործոնների ամբողջության մեջ», — ասել է ԱԳՆ ներկայացուցիչը։
Գերմանիան ԵԱՀԿ Մինսկի խմբի անդամ է։ Արցախյան հիմնախնդրի վերաբերյալ բանակցություններն անցկացվում են ԵԱՀԿ ՄԽ համանախագահ երկրների (Ռուսաստան, ԱՄՆ-ն ու Ֆրանսիա) ձևաչափով։
Հիշեցնենք` նախորդ շաբաթ Մերկելն այցելել է Հարավային Կովկասի երկրներ` Վրաստան, Հայաստան և Ադրբեջան։ Երևանում ՀՀ վարչապետ Նիկոլ Փաշինյանի հետ համատեղ ասուլիսի ժամանակ կանցլերը նշել է, որ Գերմանիան պատրաստ է ստանձնել ղարաբաղյան հակամարտության կարգավորման պատասխանատվությունը։
