ԵՐԵՎԱՆ, 30 օգոստոսի — Sputnik. ՀՀ ոստիկանապետ Վալերի Օսիպյանն այսօր լրագրողների հետ զրույցում հերքեց Ճանապարհային ոստիկանության մասին հանրության շրջանում տարածված լուրերը։
«Վստահեցնում եմ ձեզ` ճանապարհային ոստիկանությունն այսօր ավելի լավ է աշխատում, քան երեկ»,- ասաց նա` հերքելով լուրերն այն մասին, որ ճանապարհային ոստիկանները լիարժեք ծառայություն և հսկողություն չեն իրականացնում։
«Ուղղակի մեր քաղաքացիները, իմ սուբյեկտիվ կարծիքով, ուզում են, որ իշխանափոխությունից հետո արթնանան ու տեսնեն` մեր երկրում ամեն ինչ իդեալական է։ Այդպես չի կարող լինել»,- ասաց նա։
Օսիպյանն ընդունեց, որ ճանապարհային երթևեկության վիճակն իսկապես վատ է եղել իշխանափոխությանը հաջորդած առաջին 1-1.5 ամիսներին։
«Եղել են մարդիկ, որ սկսել էին շատ կոպիտ խախտումներ անել, և ես ինքս եմ դա տեսել։ Բայց վերջին ժամանակներում խստացվել է ամեն ինչ, և մենք շատ խստապահանջ ենք եղել կոպիտ խախտումներ անող վարորդների նկատմամբ»,-ասաց Օսիպյանը։
Համակարգում եղել են կրճատումներ։ Այս հարցը ոստիկանապետը ևս չի հերքում, բայց ճանապարհային ոստիկանությունը նոր կադրեր է հավաքագրում։ Ընդունելության քննություններն ընթացքի մեջ են։
