ԵՐԵՎԱՆ, 26 հունիսի — Sputnik. Հայաստանի, Բելառուսի, Ղազախստանի և Ուզբեկստանի սակրավորները սեպտեմբերի 1–ից ուսուցում կանցնեն Մերձմոսկվայի միջազգային հակաականային կենտրոնում։ Այդ մասին հաղորդում է Ռուսաստանի պաշտպանության նախարարությունը։
«Հաշվի առնելով Սիրիայում խնդիրների լուծման փորձը` միջազգային հակաականային կենտրոնում ստեղծվել են ուսումնանյութական բազաներ մարդասիրական ականազերծման ոլորտում օտարերկրյա զինվորականներ նախապատրաստելու համար։ 2018թ–ի սեպտեմբերի 1–ից նախատեսվում է Հայաստանի, Բելառուսի, Ղազախստանի և Ուզբեկստանի զինծառայողների ուսուցումը», – ասվում է հաղորդագրությունում։
Կենտրոնում արդեն սովորել են ավելի քան 50 զինծառայողներ Հայաստանից, Բելառուսից, Ղազախստանից, Ղրղըզստանի և Ուզբեկստանից։
Բացի այդ, արտասահմանյան սակրավորների նախապատրաստությունն անցկացվում է ինժեներային զորքերի մարշալ Տյումենի Ա. Ի. Պրոշլյակովի բարձրագույն ռազմաինժեներային ուսումնարանում, որտեղ ներկա պահին սովորում են 30 պետությունների ներկայացուցիչներ։
«Վերջին երեք տարիներին պետությունների քանակն ավելացել է 1,5 անգամ, իսկ սովորողների թիվը` 2,5 անգամ։ Տյումենի ուսումնարանում սովորում են ավելի քան 350 օտարերկրյա կուրսանտներ», – նշել են ՊՆ–ից։
Երեքշաբթի ռազմական կրթության հարցերը կքննարկեն Ղազախստանում, որտեղ տեղի կունենա ԱՊՀ երկրների պաշտպանության նախարարությունների խորհրդին կից ինժեներային ապահովման հարցերով համակարգող հանձնաժողովի նիստը, որին կմասնակցի Ռուսաստանի ինժեներային զորքերի հրամանատարությունը։ Դրան կմասնակցեն Հայաստանի, Բելառուսի, Ղրղըզստանի, Տաջիկստանի, Թուրքմենստանի և Ուզբեկստանի ինժեներային զորքերի պետերը։
