ԵՐԵՎԱՆ, 1 հունիսի —Sputnik. Եթե Հայաստանի քաղաքական ուժերը պայմանավորվեն արտահերթ ընտրությունների մասին, Կենտրոնական ընտրական հանձնաժողովը կապահովի անհրաժեշտ ընթացակարգերը։ Այդ մասին լրագրողներին ասաց ԿԸՀ նախագահ Տիգրան Մուկուչյանը։
«Մեր խնդիրն է այնպես անել, որ ընտրությունները տեղի ունենան կանոնների շրջանակում։ Մնացած որոշումները քաղաքական են, իսկ մենք չենք կարող միջամտել քաղաքականությանը։ Միայն քաղաքական ուժերը կարող են որոշել` կփոխվի արդյոք Ընտրական օրենսգիրքը, թե ոչ», — ասաց Մուկուչյանը։
Եթե Ընտրական օրենսգրքում փոփոխություններ արվեն, Կենտրոնական ընտրական հանձնաժողովը կարող է հայտարարել, թե ինչ աշխատանք է պահանջվելու դրանք իրագործելու համար։
Նա մեկնաբանեց նաև Նիկոլ Փաշինյանի թիմի վերջին առաջարկները, որոնցից մեկը վերաբերում է ընտրողների մատնահետքերով տվյալների միասնական բազա ստեղծելուն։
«Ժամանակին այդ հարցն ուսումնասիրվել է։ Որքան գիտեմ, մի շարք հարցեր են ծագել։ Եթե նման նախագիծ կրկին առաջարկվի, մենք կտեսնենք, թե ինչպիսի ժամկետներում կարելի է իրագործել այն», — հավելեց Մուկուչյանը։
Մուկուչյանի խոսքով` Հայաստանից դուրս քվեարկելու արգելքի մասին առաջարկը նույնպես տեխնիկապես իրագործելի է։
Ցուցակները կազմում են իրավապահ մարմինները` բնակչության ռեգիստրով։ Նրանց գլխավոր սկզբունքն այն է, որ եթե մարդը հաշվառված է Հայաստանում և ՀՀ քաղաքացի է, ապա նա մնում է ռեգիստրում` անկախ նրանից` ապրում է երկրում, թե ոչ։ Որովհետև դժվար է գնահատել` ինչպես և երբ քաղաքացուն կարելի է համարել ընդմիշտ հեռացած։ Եթե ընդունվի արմատական որոշում (ով Հայաստանում չէ, նա չի քվեարկում), ապա այստեղ էլ կարելի է գտնել տեխնիկական հնարավորություններ, հավելեց նա։
Հիշեցնենք, որ արտահերթ ընտրությունների օգտին հանդես են գալիս վարչապետ Նիկոլ Փաշինյանը և «Ծառուկյան» դաշինքը։ Խորհրդարանական մեծամասնություն կազմող ՀՀԿ-ն դրանց համար հիմքեր չի տեսնում, բայց տեսականորեն դեմ չէ քննարկել դրանք։