ԵՐԵՎԱՆ, 1 հունիսի – Sputnik. Երևանի քաղաքապետարանը Երեխաների իրավունքների պաշտպանության օրվան սկսել է պատրաստվել ամիսներ առաջ. միջոցառումներ է մշակել, մրցույթ անցկացրել, գնումներ արել։ Պետգնումների պաշտոնական կայքում հրապարակված փաստաթղթից պարզ է դառնում, որ Երևանի քաղաքապետարանը դեռ փետրվար ամսին 3 782 000 դրամի գնումների պայմանագիր է կնքել։
Այսպես` քաղաքի բյուջեից ծախսված 3 782 000 դրամից 580 000 դրամով քաղաքապետարանը կազմակերպել է հատուկ կարիքավոր երեխաների այցը թանգարաններ ու ազգային պատկերասրահ։ Դրա համար վարձել են 20 «Գազել», գնել մուտքի 500 տոմս ու վճարել գիդին։
485 000 դրամով քաղաքային իշխանությունը 20 տուփ մանկական հագուստ է գնել ու 20 ծաղկեփունջ, որպեսզի հունիսի 1-ին այցելի ծննդատներ ու նվիրի այդ օրը ծնված երեխաներին ու նրանց մայրերին։
982 000 դրամով էլ քաղաքի պաշտոնյաները հունիսի 1-ին այցելելու են հատուկ կարիք ունեցող երեխաների խնամքի հաստատություններ ու 400 երեխայի փազլներ և կոնստրուկտորներ են նվիրելու։ Այդ նպատակով, բացի նվերների գումարից, նաև ավտոմեքենաների վարձակալության համար են գումարներ ծախսվել` 5 «Գազել» վարձելու համար։
Այս բոլոր միջոցառումների կազմակերպումը քաղաքապետարանը վստահել է Ա/Ձ Արարատ Ղուկասյանին` նրա հետ փետրվարի 27-ին կնքելով 3 782 000 դրամի պայմանագիրը։
Այդ պայմանագրով, բացի վերը նշված մանկական միջոցառումների կազմակերպումից, նախատեսված են ևս երկու այլ միջոցառումներ։
750 000-ով գործարարը մայրաքաղաքի 12 վարչական շրջանների խնամակալության ու հոգաբարձության հանձնաժողովների համար սեմինարներ են կազմակերպվել և միգրացիոն օրենսդրության մասին 60 ձեռնարկ տպագրել։ Սա, ըստ պայմանագրի արվել է մարտ ամսվա ընթացքում։
Եվս 985 000 դրամով էլ սոցիալական թեմաներով քարոզչական տեսահոլովակներ են նկարահանվել ու մոնտաժվել։ Սա էլ, ըստ պայմանագրի, ապրիլ ամսվա ընթացքում է արվել։
