ԵՐԵՎԱՆ, 24 ապրիլի — Sputnik. Վարչապետի պաշտոնակատար Կարեն Կարապետյանն ընդունել է պաշտպանության նախարարի պաշտոնակատար Վիգեն Սարգսյանին: Այս մասին նշված է վարչապետի պաշտոնական կայքում։
Կարեն Կարապետյանն ընդգծել է, որ բանակը եղել ու շարունակում է մնալ պետության մշտական հոգածության ներքո և գտնվելու է անձամբ իր ուշադրության կենտրոնում: «Զինված ուժերում սկսված բարեփոխումները պետք է շարունակվեն, և ամեն ինչ պետք է արվի հայկական զինված ուժերի շարունակական արդիականացման և բանակի էլ ավելի հզորացման համար»,- ասել է նա:
Պաշտպանության նախարարի ժամանակավոր պաշտոնակատար Վիգեն Սարգսյանն էլ զեկուցել է, որ զինված ուժերը շարունակում են մեծ պատասխանատվությամբ իրականացնել իրենց վերապահված գործառույթները՝ ապահովելով երկրի պաշտպանունակությունն ու անառիկ պահելով սահմանները:
Նա վստահեցրել է, որ հայկական բանակն ունակ է դիմագրավելու հակառակորդի ցանկացած ոտնձգություն և հարկ եղած դեպքում արժանի հակահարված տալու: