ԵՐԵՎԱՆ, 23 ապրիլի — Sputnik. Այսօր ժամը 12:00-ի դրությամբ բերման են ենթարկել 37 մարդու։ Այս մասին Sputnik Արմենիային հայտնեցին ոստիկանությունից։
Նշենք, որ ավելի վաղ ոստիկանությունը հայտարարություն էր տարածել` նշելով, որն Երևանում ընթանում են հավաքներ, որոնց մասնակիցներից շատերը երիտասարդներ են:
Ոստիկանությունը հայտնել էր, որ պատրաստ է ապահովել հավաքի բնականոն ընթացքը և դրան համապատասխան երթևեկության կազմակերպումը:
Հիշեցնենք, որ արդեն ավելի քան մեկ շաբաթ է` ՀՀ–ում ցույցեր են ընթանում Սերժ Սարգսյանի վարչապետության դեմ։ Ապրիլի 22–ին ՀՀ վարչապետ Սերժ Սարգսյանի և բողոքի ակցիաների կազմակերպիչ, «Ելք» դաշինքի ղեկավար Նիկոլ Փաշինյանի ձախողված բանակցություններից հետո բողոքի ցույցերն ավելի մեծ թափ ստացան։
Երևանի Արցախի փողոցում բախումներ սկսվեցին ոստիկանների և բողոքի ակցիայի մասնակիցների միջև, ինչից հետո ակցիայի կազմակերպիչներին` Նիկոլ Փաշինյանին, Արարատ Միրզոյանին և Սասուն Միքայելյանին բերման ենթարկեցին, ապա ձերբակալվեցին։ Դատախազության տարածած հայտարարության համաձայն` նրանք բռնվել են հանրորեն վտանգավոր արարքների կատարման պահին, մասնավորապես՝ ապրիլի 13-ից կազմակերպել և անցկացրել են հավաքներ՝ անտեսելով լիազոր մարմնի՝ Երևանի քաղաքապետարանի կողմից սահմանված սահմանափակումները: