ԵՐԵՎԱՆ, 23 մարտի — Sputnik. Աշխարհահռչակ երգիչ, Շվեյցարիայում Հայաստանի դեսպան Շառլ Ազնավուրը կարևորում է արցախյան հակամարտության գոտու կայունության ապահովումը։ Նա հարցազրույց է տվել UN Special պարբերականին։
Ազնավուրը հուսով է, որ Բաքուն չի խանգարի Արցախի ու Ադրբեջանի շփման գծում հետաքննության մեխանիզմների ներդրմանը։
Ավելի վաղ նման մեխանիզմներ են առաջարկել ԵԱՀԿ Մինսկի խմբի (Ռուսաստան, ԱՄՆ ու Ֆրանսիա) համանախագահները։
Նա նաև կարևորել է զինադադարի հաստատման և ամրապնդման վերաբերյալ 1994թ. և 1995թ. ստորագրված եռակողմ համաձայնագրերի պահպանումը։
«Կարևոր է շփման գծում միջադեպերի հետաքննման մեխանիզմներ մշակել, միջնորդները բազմիցս խոսել են դրա մասին։ Դա կփրկի 18 տարեկան տղաների ու քաղաքացիների կյանքը։ Համանախագահները նաև կոչ են անում հասարակությանը խաղաղության պատրաստել, ոչ թե պատերազմի։ Հուսով եմ` նրանց ձայները լսելի կլինեն», — նշել է նա։
Շանսոնյեի խոսքով` Սումգայիթի ողբերգությունից 30 տարի անց համաշխարհային հանրությունը, այդ թվում` ՄԱԿ-ը, պետք է ավելի հետևողական լինի հակամարտությունների լուծման հարցում։
Ազնավուրը պարբերաբար բարձրաձայնում է իր դիրքորոշումը Հայաստանի համար կարևորագույն այս կամ այն հարցերով։
ՄԱԿ-ի շվեյցարական գրասենյակի հրատարակած UN Special պարբերականի հարցազրույցը նվիրված է Հայաստանի ՄԱԿ-ի անդամակցությանը, Հայաստանի ու Շվեյցարիայի դիվանագիտական հաստատությունների հարաբերությունների հաստատմանը, նաև Երևանում կայանալիք Ֆրանկոֆոնիայի 17-րդ գագաթնաժողովին։
Ֆրանսիահայ շանսոնյեն Երևանում կայանալիք գագաթնաժողովը համարում է անկախ Հայաստանի պատմության մեջ միջազգային ամենախոշոր միջոցառումը։
