ԵՐԵՎԱՆ, 28 փետրվարի — Sputnik, Արամ Գարեգինյան. 2020 թվականից ԵԱՏՄ անդամ երկրների բնակիչների համար կփոքրացնեն առցանց առևտրի «պատուհանը»։ 2019 թվականից մաքսային հարկում չի իրականացվի ամսական 500 եվրոյի առցանց գնումներ կատարելու դեպքում, իսկ 2020 թվականի հունվարի 1-ից` 200 եվրոյի առցանց գնումներ կատարելու դեպքում։
Սա ավելի քիչ է, քան այսօր թույլատրված է Հայաստանում (200 հազար դրամ կամ 340 եվրոյից մի փոքր շատ)։ Այդ պատճառով տուրք կգանձվի ոչ միայն թանկ, այլև միջին արժեքի համակարգիչների և հեռախոսների համար։
Առևտրային օպերատորները հույս ունեն, որ իրավիճակը կբարելավվի։ Առաջին հերթին գնային տարբերության պատճառով։ «Օրինակ` Եվրոպայում կամ ԱՄՆ-ում հագուստն ու տեխնիկան (հատկապես թանկ կամ հազվագյուտ) այնքան էժան են, որ նույնիսկ տուրքեր վճարելու դեպքում տեղականից ավելի թանկ չի լինի», — կարծում է Globbing առցանց առևտրի հայկական օպերատորի մարքեթինգի բաժնի ղեկավար Վահե Ղազարյանը։
Բացի այդ, նա նշում է, որ մաքսազերծում պետք է արվի միայն սահմանաչափի գերազանցած մասի համար։ Օրինակ` եթե դուք 220 հազար դրամ արժողությամբ համակարգիչ եք գնել, 10% տուրք պետք է վճարեք միայն «ավելորդ» 20 հազարի համար։
«Իսկ խոշոր գումար տնտեսելու դեպքում ավելորդ 2 հազարը շատ բան չի փոխի»,- ավելացրեց նա։
Իսկ Հայաստանում սիրում են տնտեսել. գնորդների մեծ մասը հարուստ չեն։
Դրա վկայությունն է տնտեսական գիտությունների թեկնածու Դավիթ Աբգարյանի հետազոտությունը։ 2016 թվականին նա հարցում է կատարել Ֆեյսբուքի հայ օգտատերերի շրջանում` պարզելու համար առցանց առևտրի նախասիրությունները։ Պարզվել է, որ հարցվածների գրեթե կեսն այդ պահի դրությամբ անկանխիկ առցանց գնումների փորձ է ունեցել, և 10-ից գրեթե 6-ն ամսական մոտ 135 հազար դրամ է ծախսել։
ԿԲ-ի վիճակագրության համաձայն` Հայաստանում առցանց առևտրի ծավալը (բանկային քարտերի միջոցով) 2013 թվականին կազմել է 2,9 մլրդ դրամ, 2014 թվականին` 5.5 մլրդ։ Իսկ 2015 թվականին` 20.6 մլրդ (այդ տարի շուկայում նոր խոշոր օպերատոր էր հայտնվել)։ Վերջապես 2016 թվականին (հասանելի վերջին տվյալները) ծավալը հասել է մինչև 23 մլրդ-ի։
Այդպիսով` առցանց առևտուրն ավելի մրցունակ է դառնում սովորական խանութների համար։ «Բազմոցի վրա նստած» առցանց խանութներից առևտուր անելը գնալով ավելի հասանելի է դառնում։ Եվ եվրասիական նոր սահմանաչափերը, ամենայն հավանականությամբ, դրանց համար խոչընդոտ չեն կարող դառնալ։
