ԵՐԵՎԱՆ, 11 սեպտեմբերի – Sputnik. ԱԺ վեցերորդ գումարման աշնանային նստաշրջանի առաջին օրն այսօր նիստը մեկնարկեց 91 պատգամավորով։ Որոշ ժամանակ անց, սակայն պատգամավորներից շատերը լքեցին դահլիճը։ Նրանց թվում էր նաև ԲՀԿ նախագահ Գագիկ Ծառուկյանը։ Դահլիճից դուրս գալով` Ծառուկյանը պատասխանեց լրագրողների հարցերին։
Առաջինը 2018թ-ից հետո ՀՀ վարչապետի անձի շուրջ ԲՀԿ տեսակետի մասին հարցն էր։ Գագիկ Ծառուկյանը նախ հիշեցրեց, որ դա քաղաքական մեծամասնության որոշելիք հարցն է, և ԲՀԿ-ի ձայնը որոշիչ չէ։ Ապա անդրադառնալով ներկա վարչապետի մասին հարցին` ասաց.
«Կարեն Կարապետյանն իմ ընկերն է։ Ներկայացրել է ծրագիր, որը կատարում է։ Ընկերոջ մասին կարծիք հայտնելը ես կոռեկտ չեմ համարում»։ Գործող կառավարության դրական ձեռքբերումներից Ծառուկյանը նշեց վարկերի տոկոսադրույքների նվազման միտումը, զբոսաշրջիկների թվի ավելացումը։ Իսկ որպես երկրի հիմնական ձեռքբերում, ՀԱՕԿ-ի նախագահը մատնանշեց սպորտում հայ մարզիկների ունեցած հաջողությունները։
Սերժ Սարգսյանի վարչապետ դառնալու հեռանկարին Ծառուկյանը դեմ չէ, քանի որ կարծում է` դրան պետք է ընդդիմանային ՀՀ քաղաքացիները, որոնք վերջին ընտրություններում իրենց ձայնը տվեցին ՀՀԿ-ին։
«Ասում էին՝ Ծառուկյան ջան, փրկի, փրկի, ասում էի՝ պատրաստ եմ փրկել, տվեք 50+1 տոկոս քվե»,- ասաց նա։
Այնուհետև հիշեցրեց, որ իր առաջարկած տնտեսական ծրագրի 15 կետը չընդունեցին ոչ ընտրողները, ոչ էլ իշխանությունները։