ԵՐԵՎԱՆ, 5 սեպտեմբերի — Sputnik. Ամերիկահայ հեռուստաաստղ, 36-ամյա Քարդաշյանն ու 40-ամյա Քանյե Ուեսթը երկու երեխա ունի` 4-ամյա Նորթն ու 1.5 տարեկան Սեյնթը։ Երկրորդ երեխայի ծնվելուց հետո բժիշկները նախազգուշացրել էին Քիմին, որ երրորդ հղիությունը կարող է վտանգավոր լինել նրա կյանքի և առողջության համար։
«Քիմի երկու հղիություններն էլ ռիսկային և պրոբլեմատիկ են եղել։ Հենց այդ պատճառով էլ երրորդ երեխան ունենալու համար Քիմն ու Քանյեն դիմել են փոխնակ մոր օգնությանը, որի անունը գաղտնի է պահվում», — գրում է Life and Style ամսագիրը։
Պարբերականը հիշեցնում է, թե ինչ էր ասել Քիմ Քարդաշյանը Keeping Up With The Kardashians-ի նախորդ եթերաշրջանում. «Եթե իմ վստահած երկու բժիշկներն էլ ասում են, որ երրորդ հղիությունն առողջությանս համար անվտանգ չի լինի, ուրեմն պետք է լսեմ նրանց։ Բայց քանի որ ես չգիտեի որևէ մեկին, որը կարող է փոխնակ մայր լինել կամ օգտվել է նման ծառայություններից, մինչ օրս ես այդ տարբերակը չեմ դիտարկել»։
Ամուսնական զույգը որոշել է այդ քայլին դիմել անցած տարվա դեպքից հետո, երբ Փարիզի հյուրանոցներից մեկում հանցագործները մտել էին Քիմի սենյակ ու կողոպտել նրան։
«Երրորդ երեխան երազանք էր… Մենք Քանյեի հետ միշտ էլ մտածել ենք շատ երեխաներ ունենալու մասին, բայց այն ամենից հետո, ինչի միջով ես անցա Փարիզում, այդ ցանկությունը միայն ուժեղացավ», — խոստովանել է Քիմը։
Քիմ Քարդաշյանն ու Քանյե Ուեսթն արդեն գտել են փոխնակ մորը` կնոջ և նրա ծառայությունները ներկայացնող գործակալության հետ կնքելով 113,85 հազար դոլարի փոխհատուցման պայմանագիր։ Հայտնի է, որ կինը կստանա 45 հազար, իսկ ընկերությունը` 68,85 հազար դոլար։