ԵՐԵՎԱՆ, 13 հուլիսի – Sputnik. Ֆրանսիան կողմ, որ Հայաստանն ու Ադրբեջանը ղարաբաղյան հակամարտության կարգավորման շուրջ երկխոսություն ունենան։ Այս մասին լրագրողների հետ հանդիպման ժամանակ ասաց ՀՀ-ում Ֆրանսիայի արտակարգ և լիազոր դեսպան Ժան Ֆրանսուա Շարպանտիեն։
«Հակամարտության խաղաղ կարգավորմանն այլընտրանք չկա։ Այն կարելի է հարթել միայն բանակցությունների և կանոնավոր երկխոսության միջոցով», – ասաց Շերպանտիեն։
Պետք չէ սահմանափակվել արտգործնախարարների մակարդակով հանդիպումներով, հարկավոր է աշխատել երկրների նախագահների ուղիղ երկխոսության ուղղությամբ։
«Տպավորություն է ստեղծվում, որ վերջին հանդիպումը կարող է օգնել այդ հարցում, պետք է ակտիվ աշխատել, որպեսզի այս հանդիպմանը հաջորդեն մյուսները»,– ընդգծեց դեսպանը։
Հայաստանի արտգործնախարար Էդվարդ Նալբանդյանն ու Ադրբեջանի արտգործնախարար Էլմար Մամեդյարովը հանդիպել էին հուլիսի 11-ին ՝ Լեռնային Ղարաբաղի հակամարտության լուծման հետագա աշխատանքի ընթացքը քննարկելու համար:
Արտգործնախարարները հանդիպել էին ԵԱՀԿ Մինսկի խմբի համանախագահների միջնորդությամբ և ներկայությամբ (Իգոր Պոպով, Ստեֆան Վիսկոնտին, Ռիչարդ Հոգլանդ)։
Ավելի վաղ Մինսկի խմբի համանախագահները, ԵՄ–ի և ՄԱԿ–ի ներկայացուցիչները կողմերին կոչ էին արել վերականգնել բանակցությունները և անհապաղ քայլեր ձեռնարկել իրավիճակի թուլացման ուղղությամբ։