«Ժամանակ». Միանալ, թե չմիանալ
«Ժամանակ» թերթը չի բացառում, որ «Օհանյան-Րաֆֆի-Օսկանյան» դաշինքն ընտրություններից հետո միանա Ծառուկյան դաշինքին, բայց այդ մասին հայտարարի դեռևս նախընտրական փուլում:
«Սոցիոլոգիական բոլոր հարցումներով քարոզարշավի առաջին օրերի արդյունքները ամփոփելիս՝ «Օհանյան-Րաֆֆի-Օսկանյան» դաշինքի ԱԺ անցնելու հնարավորությունները գնալով ավելի մշուշոտ են դառնում։ Այս օրերին այս դաշինքում կրկին օրակարգ են բերել և դիտարկում են ընտրություններից հետո «Ծառուկյան» դաշինքին միանալու հնարավորությունը, որի պայմանավորվածության կայացման դեպքում, ըստ դաշինքի ստրատեգների, եթե այդ մասին հայտարարվի ընտրողներին՝ դաշինքը հաստատ կկարողանա հաղթահարել անցողիկ շեմը»,- գրում է «Ժամանակ»-ը:
«Հայկական ժամանակ». Կոմունիստներին ֆինանսավորում է Ռուսաստանը
Թերթի տեղեկություններով՝ Հայաստանի կոմունիստական կուսակցությունը, որը վարչական, բիզնես կամ այլ լծակներ չունի ու հիմնականում մեծահասակներից է կազմված՝ նախընտրական ծախսերի համար գումար է ստացել Ռուսաստանի գործընկերներից:
ՀԿԿ ցուցակի երկրորդ հորիզոնականը զբաղեցնող Վազգեն Սարգսյանը, թերթի հետ զրույցում հերքել է լուրը, ասելով. «Ոչ, մենք ունենք մոտ 25 հազար անդամ, և մեր այդ անդամների տրամադրած գումարներով ենք ձևավորել մեր նախընտրական հիմնադրամի բյուջեն: Մենք դրան երկար ենք պատրաստվել»:
«Իսկ մեր տեղեկություններով՝ Ռուսաստանի Դաշնության կոմունիստական կուսակցության ղեկավար Գենադի Զյուգանովն իր հայ գործընկերներին ֆինանսապես օգնել է, որպեսզի Հայաստանում իրենց գաղափարակիրները գոնե գոյություն ունենան»,- պնդում է «Հայկական ժամանակ»-ը:
«Ժողովուրդ». Բանտապետերն աշխատելու են նախարարի համար
«Ժողովուրդ» օրաթերթը գրում է. ««Ժողովուրդ»-ի տեղեկություններով՝ ՀՀ արդարադատության նախարարության քրեակատարողական հիմնարկների ղեկավարները խնդիր են դրել խորհրդարանական ընտրություններին ՀՀԿ-ի օգտին կալանավայրերից հնարավորինս շատ ձայն ապահովել: ՙՆրանց շահագրգռվածության պատճառներից մեկն էլ այն է, որ ՀՀԿ համամասնական ընտրացուցակի առաջին եռյակում ընդգրկված է արդարադատության նախարար Արփինե Հովհաննիսյանը, և բանտապետերը, ըստ հրահանգի, աշխատելու են իրենց շեֆի համար՚,- գրում է «Ժողովուրդ-ը:
«Հրապարակ». Մանկապարտեզի տնօրենները ստուգողականներ են հանձնում
«Հրապարակ» թերթն էլ հայտնում է, որ թվեր են դրվել նաև Երևանի Մալաթիա‐Սեբաստիա վարչական շրջանի մանկապարտեզների տնօրենների վրա:
«Սամվել Ալեքսանյանի եղբորորդու՝ Երևանի Մալաթիա‐Սեբաստիա վարչական շրջանի ղեկավար Արտակ Ալեքսանյանի հրահանգով աշխատանքից հետո համայնքի մանկապարտեզների դաստիարակները տնետուն են շրջում ու ցուցակագրում ՀՀԿ‐ի ընտրողներին»,- գրում է թերթը:
Իսկ այդ պարտավորությունից տրտնջացող աշխատակիցներից մեկին, մանկապարտեզներից մեկի տնօրենը, թերթի փոխանցմամբ, ասել է. «Անպայման պետք է թիվ ներկայացնենք, այլապես կազատվեմ աշխատանքից»։
«Հրապարակ» թերթը նաև հավելում է, որ նման «ստուգողական» ցուցակագրումներ իրականացվում են նաև մարզերում:
«Հայկական ժամանակ. Շաքարը քաղցրացրել է Սամվել Ալեքսանյանի կյանքը
«Հայկական ժամանակ»-ը գրում է, որ ԱԺ պատգամավոր Սամվել Ալեքսանյանի հետ կապված «Ալեքս Գրիգ» ընկերությունը անցած տարվա 4‐րդ եռամսյակում շաքարի թանկացման շնորհիվ ունեցել է մոտ 2 մլն դոլարի լրացուցիչ շահույթ: Ըստ թերթի, այդ մասին են վկայում ՀՀ արտաքին առևտրի վերաբերյալ ՊԵԿ‐ի հրապարակած մանրամասն տվյալները:
Դրանց համաձայն, 2016 թվականի ընթացքում «Ալեքս Գրիգ» ընկերությունը ներկրել է 58 հազար տոննա շաքար ﴾կամ շաքարի հումք﴿, որի յուրաքանչյուր կիլոգրամի մաքսային արժեքը կազմել է 35 ցենտ: Սա ավելի էժան է, քան 2015 թվականի ընթացքում նրա ներկրած շաքարի մաքսային արժեքը: Սակայն 2016 թվականի վերջին ամիսներին մեր խանութներում շաքարը կտրուկ թանկացել է` մոտ 50 դրամով:
«Այլ կերպ ասած, միևնույն ինքնարժեքով շաքարը սկսել են վաճառել ավելի թանկ: Պարզ հաշվարկները ցույց են տալիս, որ ստացված լրացուցիչ շահույթը կազմել է մոտ 2 միլիոն դոլար: Դրան զուգահեռ «Ալեքս Գրիգ» ընկերությունը 2016 թվականին նվազեցրել է բյուջե վճարած հարկերը, չնայած պետք է տեղի ունենար հակառակը՚,- գրում է ՙՀայկական ժամանակ՚-ը:
«Ժողովուրդ». Մեղադրանքները դատարանում փլուզվում են
«Ժողովուրդ» օրաթերթն անդրադարձել է Գլխավոր դատախազությունում օրերս անցկացված կոլեգիայի նիստի,ն, որը թերթի որակմամբ «բավական թեժ» ընթացք է ունեցել:
Ինչպես նշել են «Ժողովուրդ» օրաթերթի աղբյուրները, ՀՀ գլխավոր դատախազ Արթուր Դավթյանը խոսել է իրավապահ մարմինների ներկայացուցիչների ոչ արդյունավետ աշխատանքի հետևանքով առաջացած համակարգային խնդիրների մասին, մասնավորապես՝ նախաքննության փուլում քննիչների կողմից թույլ տված սխալների ու քրեական գործերի նախաքննությունն ընթանում թույլ տված բացթողումների մասին, որոնց արդյունքում` դատարանում մեղադրանքը պարզապես փլուզվում է, և հաճախ դատավորներն արդարացման դատավճիռներ են արձակում:
Թերթը նաև պաշտոնական վիճակագրությունն է մեջբերում, որի համաձայնч 2016թ.-ին լրիվ կամ մասնակի արդարացվել է 187 անձ՝ մեղադրյալների 5%-ը, իսկ 2015 թվականի ընթացքում լրիվ կամ մասնակի արդարացվել է 157 անձ` 4%-ը:
«Ժողովուրդ»-ի տեղեկություններով Արթուր Դավթյանը ստեղծված իրավիճակի համար քննադատել է նաև դատախազներին, որոնք ի պաշտոնե պարտավոր են հսկողություն սահմանել նախաքննության նկատմամբ, և զգուշացրել, որ նմանօրինակ դեպքեր կրկնվելու դեպքում դատախազները պատասխան են տալու:
