ԵՐԵՎԱՆ, 27 փետրվարի — Sputnik. Անգլիայի լիգայի Գավաթի եզրափակիչ խաղում «Մանչեսթեր Յունայթեդը» «Ուեմբլի» մարզադաշտում ընդունեց «Սաութհեմփթոնին»:
Խաղն ավարտվեց «կարմիր սատանաների» դժվարին հաղթանակով` 3:2: «Սրբերը» խաղի սկզբնամասում գնդակ ուղարկեցին տանտերերի դարպաս, բայց հանդիպման մրցավար Անդրե Մարիները չգրանցեց այն` նշելով, որ «Սաութհեմփթոնի» հարձակվող Մանոլո Գաբիադինին գտնվել է խաղից դուրս վիճակում:
It's ours👊🏼 #EFLCup Winners 2017 🏆 #mufc pic.twitter.com/i4PorWRQPO
— Henrikh Mkhitaryan (@HenrikhMkh) 26 февраля 2017 г.
Խաղի հաշիվը տուգանային հարվածով բացեց Զլատան Իբրահիմովիչը: Այն կրկնապատկեց Ջեսի Լինգարդը: Խաղակեսի ավարտից առաջ Մանոլո Գաբիադինին կրճատեց հանդիպման հաշիվը: Երկրորդ խաղակեսի սկզբնամասում իտալացին դուբլի հեղինակ դարձավ, բայց խաղավարտից առաջ հանդիպման վերջնական հաշիվը ձևակերպեց Զլատան Իբրահիմովիչը:
Այսպիսով, Հայաստանի ազգային հավաքականի ավագ, կիսապաշտպան Հենրիխ Մխիթարյանն իր երկրորդ տիտղոսը նվաճեց «Մանչեսթեր Յունայթեդի» կազմում, չնայած, որ վնասվածքի պատճառով չէր մասնակցում հանդիպմանը: Առաջին տիտղոսն Անգլիայի Սուպերգավաթն էր: Նախորդ տարի «Մանչեսթեր Յունայթեդը» 2:1 հաշվով հաղթել էր «Լեսթերին»:
«Մանչեսթեր Յունայթեդը» պատմության մեջ 5-րդ անգամ նվաճեց Անգլիայի լիգայի գավաթը: