ԵՐԵՎԱՆ, 16 փետրվարի — Sputnik. «Ալ Զահրա» բժշկական և ուսումնական կենտրոնի հայ բուժքույր Անահիտ Փիլոսյանը Հիվանդներին խնամելու կազմակերպության կողմից ճանաչվել է 1395թ-ի օրինակելի բուժքույր (2016թ-ը` իրանական օրացույցով), հաղորդում է Nor Jugha-ն։
Նա արժանացել է այդ կոչմանը հիվանդների նկատմամբ ուշադրության, աշխատանքում ջանասիրության և բծախնդրության համար։
Փիլոսյանը ծնվել է 1976թ-ին Աղվազ քաղաքում, կրթություն է ստացել «Գարուն», «Րաֆֆի» հայկական դպրոցներում և պարսկական «Էֆատ» դպրոցում։ Նա համալսարանական բժշկական կրթություն է ստացել հայրենի քաղաքում, որից հետո աշխատել է Սպահանի «Ալ Զահրա» հիվանդանոցում։
Նշենք, որ ժամանակակից Իրանում գործում է երեք օրացույց` պարսկական, իսլամական թվականություն լուսնային հիջրայով (այսօր այս օրացույցով 30.05.1433թ. է) և Գրիգորյան։ Դուք կնկատեք բոլոր երեք տարեթվերը բոլոր օրացույցներում, լրատվական հաղորդումներում և այլն։ Բնականաբար, իրանցիների առօրյա կյանքում օգտագործվում է պարսկական օրացույցը, իսկ իսլամական թվականությունն օգտագործվում է կրոնական նպատակներով։