ԵՐԵՎԱՆ, 8 փետրվարի — Sputnik. Ավստրալիացի փոփ-աստղ Քայլի Մինոգը դատարանով հետ է վերցրել Kylie առևտրային ապրանքանիշի իր իրավունքները Քիմ Քարդաշյանի կրտսեր քրոջից` Քայլի Ջեներից, հայտնում է BBC Russian-ը։
Դեռևս 2014 թվականին «Քարդաշյանների ընտանիքը» ռեալիթի-շոուի մասնակից Քայլի Ջեների (այն ժամանակ նա 17 տարեկան էր) իրավաբանը դատարան հայց է ներկայացրել ԱՄՆ տարածքում Kylie ապրանքանիշի իրավունքների ձևակերպման համար, որը թույլ էր տալու կոսմետիկա և հագուստ արտադրել։
48-ամյա երգչուհի Քայլի Մինոգի ապրանքանիշերի իրավունքների պահպանման համար պատասխանատու KDB ավստրալիական ընկերությունը դեմ է հանդես եկել դրան և 2016 թվականի փետրվարին դատական հայց ներկայացրել։ Վաշինգտոնի դատարանի որոշմամաբ, Ջեների կոսմետիկան կարող է թյուրիմացության մեջ գցել սպառողներին և կրճատել Քայլի Մինոգ բրենդով ապրանքի վաճառքը։