Հայկական ժամանակ. «Փոքրիկ օրինակ»
Վերջին շրջանում տնտեսվարողները գոհունակությամբ արձանագրում են, որ հսկիչ դրամարկղային մեքենաների համար նախատեսված թղթե ժապավենների գները զգալիորեն նվազել են։ Մի քանի ամսվա ընթացքում դրանք էժանացել են երկու անգամ։
«Դեռ հեռավոր 2012 թվականին կառավարությունը շրջանակային պայմանագիր կնքեց «Ալեքսերվ» ընկերության հետ այդ ժապավենների մատակարարման համար, և այդ «բիզնեսի» մոնոպոլիան հրապարակայնորեն տվեց մեկ ընկերության։ Ուշագրավն այն էր, որ «Ալեքսերվ» ընկերությունը գրանված էր նույն այն հասցեում, որտեղ գրանցված էր ՀՀ նախկին ՊԵԿ նախագահ, ապա ֆինանսների նախագահ Գագիկ Խաչատրյանի հարազատներին պատկանող «Յուքոմ» ընկերությունը։ Մի քանի ամիս առաջ, Գագիկ Խաչատրյանի ազդեցության նվազմանը զուգահեռ, այդ շուկայում հայտնվեցին այլ ներկրողներ, և ժամանակի ընթացքում այդ ապրանքի գինը շուկայում կտրուկ նվազել է»,-գրում է թերթը։
Ժամանակ. «Աչք ու ականջ»
Թերթը տեղեկություններ ունի, թե ՀՀԿ շտաբում ով կարող է տեսածն ու լսածն արագ փոխանցել ՀՀ նախագահին։
«ՊԵԿ նախկին նախագահ Հովիկ Հովսեփյանը, որը նախկինում զբաղեցնում էր նախագահի վերահսկողական ծառայության պետի պաշտոնը, ներկայումս հանգրվանել է ՀՀԿ շտաբում։ Վերջնս առերևույթ զբաղված է կուսակցության նախընտրական կազմակերպչական աշխատանքներով, սակայն հիմնական գործառույթը լսելն ու տեսնելն է այն ամենը, ինչ կատարվում է շտաբում, որպեսզի այս ամենը զեկուցի Սերժ Սարգսյանին»,- գրում է թերթը։
Հրապարակ. «Անձամբ գնդակահարելու է»
Թերթի տեղեկություններով ԲՀԿ-ական Նաիրա Զոհրաբյանը շրջում է Վանաձորում ու սպառնում գնդակահարել, եթե մեկը վաճառի իր տեղը։
«Մինչ ԲՀԿ-ում որոշում են, թե ով է լինելու իրենց ցուցակի երկրորդ գենդերը, հիշեցնենք, որ առաջին քառյակն ունի հետևյալ պատկերը` Գագիկ Ծառուկյան, Խաչատուր Սուքիասյան, Իշխան Զաքարյան, Նաիրա Զոհրաբյան։ Վերջինս Ֆաինա Կապլանի ջերմեռանդությամբ շրջում է Սպիտակում և մյուս մարզերում, հատկապես հանձնաժողովի նախագահներին սպառնում` «անձամբ է գնդակահարելու, եթե վերջինս մտքի ծայրով անցկացնի վաճառել իր տեղը որևէ մեկին»։ Հանձնաժողովի նախագահները, ըստ մեր աղբյուրների, ժպիտով են վերաբերվում սույն հրովարտակին, քանի որ իրենք բոլորից լավ գիտեն, որ նման հայդաբուդուր մեխանիզմները չեն աշխատել ու չեն աշխատելու»,-գրում է թերթը։
Չորրորդ իշխանություն. Ստվերը թարս բուսնեց
ՀՀ պետեկամուտների կոմիտեի հրապարակած պաշտոնական տվյալների համաձայն ժ` 2016 թվականին Սամվել Ալեքսանյանի ընկերությունները նախորդ տարվա համեմատ 2.7 միլիարդ դրամով ավելի քիչ հարկեր են վճարել։ Նվազումը կազմել է 13 տոկոս։
«Եթե որևէ նորմալ երկրում խոշոր գործարարի վճարած հարկերը 13 տոկոսով նվազում են, նշանակում է` նրա գործերը շատ վատ են։ Իսկ Հայաստանի նման երկրներում հարկերի նվազումը ճիշտ հակառակն է նշանակում` գործերը շատ լավ են։ Բայց ՀՀ իշխանությունները, ինչպես հայտնի է, անհաշտ պայքար են սկսել ստվերային տնտեսության դեմ։ Ըստ երևույթին, կոնկրետ Սամվել Ալեքսանյանի դեպքում պայքարն այնքան հուժկու է եղել, որ ազդել է նաև «սպիտակ» բիզնեսի վրա, ու հակառակ արդյունքն է ստացվել` վճարված հարկերն ավելանալու փոխարեն նվազել են»,-գրում է թերթը։
Ժողովուրդ. «Կեղծ դիպլոմներ են բաժանել»
ԱԱԾ-ն վերջերս բացահայտել էր Հայաստանի 3 ոչ պետական բուհերում կեղծ դիպլոմներ տալու դեպքեր, բայց մինչև հիմա շարունակում է գաղտնի պահել այդ ուսումնական հաստատությունների անունները։
««Ժողովուրդ»-ին տված հարցազրույցում, պատասխանելով հարցին, թե արդյոք խոսել է այդ բուհերի ռեկտորների հետ, արդյոք նրանք ընդունում են իրենց մեղքը, ՀՀ ԿԳ նախարար Լևոն Մկրտչյանը նշել է. «Քանի որ պաշտոնական դեռ որևէ խնդիր չկա իմ առաջ դրված, ի տարբերություն ռեկտորների` իրավասու չեմ որևէ խոսք ասել։ Մենք աշխատում ենք, ունենք լավ բուհեր ոչ պետական համակարգում, եթե այդպիսի դեպքեր լինում են, դրանք եզակի դեպքերն են որովհետև, ի վերջո, կեղծ վկայականներ տալը շատ հեշտ է բռնվում, շատ հեշտ է բացահայտվում»»,- գրում է թերթը։
