ԵՐԵՎԱն, 10 նոյեմբերի — Sputnik. Ազգային ժողովի նախագահ Գալուստ Սահակյանը շնորհավորական ուղերձ է հղել Երիտասարդության համաշխարհային օրվա առթիվ։
«Այս տարի նշեցինք Հայաստանի անկախության 25-ամյակը: Այն ոչ միայն մեր պատմության փայլուն էջն է, այլև ժամանակի երիտասարդության մեծագույն ձեռքբերումներից մեկը, որովհետև 25 տարի առաջ հենց երիտասարդությունն էր անկախության հիմնաքարը հանդիսացած արցախյան շարժման ամենաակտիվ ուժը»,- ուղերձում նշել է ԱԺ նախագահը:
Ըստ նրա` այսօր էլ երիտասարդությունը քաղաքական գործընթացների կիզակետում է և քաղաքացիական հասարակության հիմքը` ավելի ինքնուրույն, ավելի խելամիտ ու ավելի նախաձեռնող գործելակերպով, ավելի թարմ շնչառությամբ:
«Իսկ թարմ շնչառության ու թարմ գաղափարների անհրաժեշտություն եղել է ու կա բոլոր ժամանակներում և բոլոր այն երկրներում, որտեղ ոչ միայն ցանկանում են առաջ շարժվել, այլև իսկապես քայլում են այդ ուղղությամբ»,- ասել է Սահակյանը:
ԱԺ խոսնակի խոսքով` այն, որ այսօրվա երիտասարդներն ավելի լավ են կողմնորոշվում, թե ինչպես ապրել, ինչպես և ինչի մասին երազել ու ինչպես իրականություն դարձնել երազանքը, անկախության լավագույն ձեռքբերումներից է և անխուսափելի անհրաժեշտություն ներկա ժամանակներում:
«Աշխարհն ավելի գործնական, ավելի զգացմունքազերծ ու նույնիսկ ավելի սառն է դարձել` պարտադրելով հնարավորինս խուսափել այն մտածելակերպից, թե ով պետք է մեզ ինչ-որ բանով օգնի, ով պետք է մեզ ինչ-որ բան նվիրի»,- նշել է ԱԺ նախագահը:
Նա վստահեցրել է` հաջողության են հասնում նրանք, ովքեր չեն տրտնջում և խղճահարություն չեն ակնկալում, ովքեր նպատակասլաց առաջ են շարժվում, ովքեր մտածում են և միտքը` գաղափար, գաղափարը` գործ դարձնում, ովքեր հաջողությամբ կարողանում են համադրել ավանդույթն ու նորարարությունը, ովքեր գիտակցում են, որ իրենց հաջողությունը իրենց երկրի ու ժողովրդի հաջողությունն է, իրենց ճակատագիրը` երկրի ճակատագիրը:
«Վստահ եմ, որ դուք` Հայաստանի երիտասարդներդ, լիարժեքորեն եք զգում ժամանակն ու պահը, ձեր պատասխանատվությունը երկրի ճակատագրի հանդեպ և պատրաստ եք գործնականորեն մասնակցել այն ապագայի կերտմանը, որը երազում եք և որին էլ ուղղված են ձեր միտքն ու խոհը, ձեր խոսքն ու գործը»,- ասված է ԱԺ նախագահի շնորհավորական ուղերձում:
