ԵՐԵՎԱՆ, 2 նոյեմբերի — Sputnik. Հայերեն Աստվածաշունչը տարբեր էլեկտրոնային ձևաչափերով իրենց բջջային սարքերում ներբեռնել են 8 379 օգտատերեր, գրում է «Բլագովեստ ինֆոն»` հղում անելով Հառ Առաքելական եկեղեցու Արարատյան թեմի պաշտոնական կայքի հեղինակ, թեմի էլեկտրոնային քարոզչության պատասխանատու Էլզա Մանուկյանին։
Նրա խոսքով` էլեկտրոնային Աստվածաշունչ ստեղծելու գաղափարը ստացվել է Արարատյան թեմի կայքի այցելուներից մեկի կողմից 10 տարի առաջ։
«Այդ ժամանակ մեզ դիմեց օգտատերերից մեկը` առաջարկելով սեփական ուժերով հայերեն լեզվով էլեկտրոնային Աստվածաշունչ ստեղծել։ Այդ ժամանակ մենք առանձնապես հնարավորություններ չունեինք և, իհարկե, ուրախությամբ համաձայնեցինք։ Հիմքում ընկած է Աստվածաշնչի հայերեն թարգմանությունը` հաստատված Մայր Աթոռ Սուրբ Էջմիածնի կողմից։ Այնուհետև գաղափարի հեղինակը սկսեց ստեղծել Աստվածաշնչի էլեկտրոնային տարբերակը։ Եվ ահա արդեն 9 տարի Արարատյան թեմի կայքում տեղադրված է էլեկտրոնային Աստվածաշունչը։ Էջը կոչվում է «Սուրբ Գիրքը պլանշետներում»։ Այնտեղ ցանկացած մարդ կարող է անվճար ներբեռնել Աստվածաշունչը»,- ասել է Մանուկյանը։
Կայքում կա նաև մեկ այլ բաժին` «Սուրբ Գիրքը մեկ տարում»` բաժանված 365 մասի։ Ընթերցողները կարող են ամեն օր մի հատված կարդալ Հին կամ Նոր կտակարանից և մինչև տարեվերջ ավարտել Աստվածաշնչի ընթերցումը։
Մանուկյանի խոսքով` շուտով ընթերցողները կարող են ներբեռնել նաև Աստվածաշնչի էլեկտրոնային ձևաչափը գրաբարով։ Դա շատ կարևոր է, քանի որ Աստվածաշունչը գրաբարով համարվում է Սուրբ գրքի թարգմանության առավել ստույգ տարբերակը, ուստի այդ թարգմանությունն անվանում են «Թարգմանությունների թագուհի»։
