ԵՐԵՎԱՆ, 19 օգոստոսի — Sputnik. 31-րդ ամառային Օլիմպիական խաղերի 14-րդ օրը պայքարի մեջ կմտնեն ազատ ոճի ըմբիշները, հայտնում են ՀԱՕԿ լրատվության բաժնից:
Հայ մարզիկներից առաջինը պայքարը 57 կգ քաշային կարգում կսկսի Գառնիկ Մնացականյանը 1/8 եզրափակչից, նրա առաջին մրցակիցն Իրանի Իսլամական Հանրապետության ներկայացուցիչ Հասան Սաբզալի Ռահիմին է:
Հաղթանակի դեպքում հայ ըմբիշը 1/4 եզրափակչում կմրցի Վիկտոր Լեբեդև (Ռուսաստան) — Սանդեպ Տոմար (Հնդկաստան) զույգի հաղթողի հետ:
Ազատ ոճի ըմբշամարտի Հայաստանի թիմի կազմում Ռիո են մեկնել նաև Դավիթ Սաֆարյանը (65 կգ), Գեորգի Կետոևը (97 կգ) և Լևան Բերիանիձեն (125 կգ): Լևան Բերիանիձեն կմենամարտի օգոսոտոսի 20-ին, իսկ 2013թ. աշխարհի ու Եվրոպայի չեմպիոն Դավիթ Սաֆարյանը և Գեորգի Կետոևը` օգոսոտոսի 21-ին:
Հիշեցնենք, որ հունահռոմեական ոճի ըմբշամարտի Հայաստանի հավաքականը նույնպես Ռիո էր մեկնել 4 մարզիկով և մեկ ոսկե ու մեկ արծաթե մեդալ է նվաճել` թիմային հաշվարկում գրավելով երրորդ տեղը Կուբայից ու Ռուսաստանից հետո: