ԵՐԵՎԱՆ, 19 օգոստոսի — Sputnik. Իրանի տարածքից դեպի Կովկաս տեղաշարժվող հերթական տաք օդի ալիքը հասնում է Հայաստան, հայտնում է Հիդրոմետ ծառայության օդերևութաբանութան կենտրոնի պետի տեղակալ Գագիկ Սուրենյանը Ֆեյսբուքի իր էջում:
Արևադարձային տաք հոսանքների ներթափանցումը կսկսվի ուրբաթ կեսօրից և կպահպանվի մինչև օգոստոսի 25-ը ներառյալ:
Սուրենյանը նշել է, որ եթե վերջին օրերին հանրապետության հատկապես հյուսիսային մարզերում երեկոյան ժամերին դիտվում էին անձրևներ, ապա այսօրվանից սկսած երկրի ողջ տարածքում կհաստատվի առանց տեղումների եղանակ: Օդի ջերմաստիճանը կբարձրանա 3-4 աստիճանով:
Ամենաշոգ շրջանները կլինեն Երևանը, Արարատյան դաշտը և Սյունիքի հովիտները, որտեղ այսօր սպասվում է մինչև +37, իսկ այնուհետև` +38…+39 աստիճան տաքություն: