ԵՐԵՎԱՆ, 17 օգոստոսի — Sputnik. Հայ ծանրամարտիկ, օլիմպիական փոխչեմպիոն Գոռ Մինասյանը մրցապայքարից հետո նշեց, որ երջանիկ է, քանի որ բոլորին չէ, որ բախտ է վիճակվում օլիմպիադայի մասնակցել։
«Ես մասնակցել եմ, կարծում եմ` բոլորը գոհ են իմ արդյունքից, անձնական նոր ռեկորդներ եմ գրանցել, օլիմպիական արծաթ եմ նվաճել մեր երկրի համար, շատ լավ են տպավորությունները»,- ասաց Մինասյանը։
Նա նշեց, որ եթե հրում վարժության երկրորդ մոտեցման ժամանակ տեխնիկական թերություն չլիներ, ավելի շատ կիլոգրամներ կբարձրացներ։
«Նոր մրցակիցներ այստեղ չկային, բոլորի հետ ծանոթ էի, չեմպիոնի հետ պայքարում եմ արդեն 6 տարի»,- նշեց նա։
Մինասյանն ընդգծեց, որ Հայաստանի հավաքականի համար մեծ գործ կատարեց ծանրամարտիկ Սիմոն Մարտիրոսյանը, ով առաջին մեդալը նվաճեց։
«Օլիմպիական մեդալների պատմության մեջ չի եղել 19 տարեկան արծաթե մեդալակիր, ոչ միայն ծանրամարտում, այլև հայկական սպորտում ընդհանրապես։ Սիմոնի գործոնը աշխատեց, 19-ամյա պատանին մեզ ոգևորեց, սառույցը կոտրեց, մեզ դրդեց ավելի շատ կիլոգրամների»,- նշեց Մինասյանը։
Նա հայտնեց նաև, որ արդեն շնորհավորել է Հայաստանի համար ոսկե մեդալ նվաճած Արթուր Ալեքսանյանին։