ԵՐԵՎԱՆ, 16 օգոստոսի-Sputnik. Սիմոն Մարտիրոսյանը շատ վստահ ու հանգիստ սկսեց իր մոտեցումները:
Ծանրամարտում միշտ էլ շատ կարևոր է մրցումների ընթացքում իրացնել բոլոր մոտեցումները, ու հայ ծանրորդը արժանի կերպով հանդես եկավ նախ պոկում վարժությունում:
Սկսելով իր ելույթները 185 կիլոգրամից, Սիմոն Մարտիրոսյանը հինգ կիլոգրամանոց քայլեր կատարելով, չկարողացավ իրացնել երրորդ մոտեցումն ու պոկում վարժությունն ավարտեց 190կգ արդյունքով, ինչը հինգերորդ արդյունքն էր առաջին վարժությունում:

Հրում վարժությունում առաջին մոտեցման համար հայ ծանրորդը պատվիրել էր 220կգ:
Սիմոնը նորից շատ վստահ մոտեցավ և հստակ կատարեց վարժությունն ու միանգամից ութ կիլոգրամով ավելացրեց Եվրոպայի առաջնությունում երկամարտի իր արդյունքը:
Հետո մեր մարզիկը ևս մեկ հիանալի մոտեցում կատարեց ու գլխավերևում պահելով 227կգ՝ երկամարտում վաստակեց 417 կիլոգրամ:Դա արդեն հայտ էր մեդալի համար:
Սիմոն Մարտիրոսյանը շարունակում էր պայքարել ոսկե մեդալի համար, բայց արդեն իսկ ապացուցել էր իր բարձր կարգը:
Ի վերջո, երկամարտի արդյունքը երկրորդն էր: Հայաստանի օլիմպիական հավաքականը առաջին մեդալը վաստակեց ի դեմս Սիմոն Մարտիրոսյանի նվաճման ու, կարելի է ասել՝ վերջապես: Բռավո Սիմոն Մարտիրոսյան: