ԵՐԵՎԱՆ, 10 օգոստոսի — Sputnik. Օգոստոսի 10-ին մեկնարկում է Լեոնիդ Ենգիբարովի անվան մնջախաղի միջազգային փառատոնը։
Եթե մինչ այժմ փառատոնն անցկացվում էր երկու տարին մեկ անգամ, ապա այս տարվանից այն կդառնա ամենամյա։
Ինչպես ավելի վաղ լրագրողներին հայտնել էր Երևանի մնջախաղի թատրոնի գեղարվեստական ղեկավար Ժիրայր Դադասյանը, այս տարի Ծաղկաձորից բացի ներկայացումներ կցուցադրվեն նաև Դիլիջանում։
Դադասյանի խոսքով` մնջախաղի փառատոնը տարբերվում է մյուսներից. այն հասարակ ժողովրդի համար է։ Այստեղ չկան տոմսեր, ներկայացումները տեղի են ունենում փողոցում, և բոլորը կարող են դիտել դրանք։ Հենց այդ պատճառով փառատոնային ներկայացումներում միշտ անշլագ է։
Փառատոնին ելույթ կունենան ոչ միայն միմեր, այլև կրկեսի դերասաններ և պարային խմբեր։
Փառատոնի կազմակերպիչներն են ՀՀ մշակույթի նախարարությունը, Երևանի մնջախաղի պետական թատրոնը և Ծաղկաձորի քաղաքապետարանը։