ԵՐԵՎԱՆ, 4 օգոստոսի — Sputnik. Ղարաբաղյան հակամարտության կարգավորման հարցը չի կարող ենթադրել միակողմանի զիջումներ, հինգշաբթի կառավարության նիստից հետո լրագրողներին ասաց ՀՀ արտգործնախարարի տեղակալ Շավարշ Քոչարյանը։
Նա չբացառեց, որ Հայաստանի և Ռուսաստանի նախագահները օգոստոսի 10-ին կայանալիք հանդիպման ընթացքում կքննարկեն ղարաբաղյան հիմնախնդրի կարգավորումը։
«Կարծում եմ` կան քննարկման առարկա շատ հարցեր։ Լիովին հավանական է, որ կքննարկվի նաև ղարաբաղյան հարցը», — ասաց Քոչարյանը` մեկնաբանելով Հայաստանի և Ռուսաստանի նախագահների գալիք հանդիպումը։
Փոխնախարարն ընդգծեց, որ տարածքներ զիջելու մասին երբևէ խոսք չի եղել և չի էլ կարող լինել։
«Այստեղ երկու պահ կա։ Առաջին` Վիեննայում, իսկ ավելի ուշ` Սանկտ Պետերբուրգում կայացած հանդիպումների արդյունքները։ Դա վերաբերում է վստահության մթնոլորտի ստեղծմանը։ Առաջին հերթին նշանակում է, որ շփման գծում չպետք է սադրանքներ, կրակոցներ լինեն»,- նշեց փոխնախարարը։
Քոչարյանի խոսքով` խոսքը համանախագահ երկրների առաջարկած մեխանիզմների մասին է, և այդ ուղղությամբ պետք է համապատասխան աշխատանք տանել։ Նրա խոսքով` երկրորդ պահը հենց բանակցային գործընթացն է, որը կարող է հաջող շարունակվել միայն այդ հարցերի լուծման դեպքում։
«Բանակցություններն ընթանում են, բայց ակնհայտ է, որ ադրբեջանական կողմն այլ կերպ է մեկնաբանում ձեռք բերված պայմանավորվածությունները. բանակցությունների սեղանի շուրջ նա այլ բան է ասում։ Ակնհայտ է, որ բանակցությունները ձախողելու փորձեր են ձեռնարկվում», — ասաց Քոչարյանը։
Հայաստանի նախագահ Սերժ Սարգսյանը Վլադիմիր Պուտինի հրավերով օգոստոսի 10-ին աշխատանքային այցով կմեկնի Մոսկվա։