ԵՐԵՎԱՆ, 12 հունվարի — Sputnik. Ռուսական «Գազպրոմ» ընկերության հետ Վրաստանը քննարկում է համագործակցության նոր պայմանները` ցանկանալով գումարային փոխհատուցում ստանալ իր տարածքով Հայաստան ռուսական գազի մատակարարման համար, հայտնում է ՌԻԱ նովոստին` հղում անելով Վրաստանի փոխվարչապետ, էներգետիկայի նախարար Կախա Կալաձեին։
«Մենք պահանջում ենք վերանայել պայմանագրի պայմանները։ Մանսավորապես, որպեսզի մենք անցնենք գումարային վճարման մատակարարվող գազի 10 տոկոսի դիմաց», — ասել է Կալաձեն, ում խոսքերն է մեջբերում Sputnik գործակալությունը։ Կողմերն արդեն վաղուց են բանակցություններ վարում, մի քանի հանդիպում է տեղի ունեցել, թեև համաձայնություն դեռ ձեռք չի բերվել, նշել է նախարարը։
Կալաձեի ու «Գազպրոմի» վարչության ներկայացուցիչ Ալեքսեյ Միլերի բանակցությունները Վրաստանում մեծ աղմուկ են բարձրացրել։ Քննադատությամբ հանդես են եկել վրացական ընդդիմության ներկայացուցիչները և մի քանի փորձագետներ` պնդելով, որ «Գազպրոմի» հետ համագործակցությունը Վրաստանին կզրկի էներգետիկ անկախությունից։
«Այն, ինչ, այսպես կոչված, փորձագետները ողբերգություն են ներկայացնում, իրականում անհեթեթ է ու անլուրջ», — նշել է Կալաձեն։
Կալաձեն նախկինում էլ ստիպված է եղել պարզաբանումներ տալ ԶԼՄ-ների համար։ Նրա խոսքով` Վրաստան գազի գլխավոր մատակարարն Ադրբեջանն է, սակայն իշխանությունները մտածում են դիվերսիֆիկացնել էներգետիկ աղբյուրները։ Ինչ վերաբերում է «Գազպրոմից» գազի գնմանը, նախարարը նշել է, որ այդ հարցը վերաբերում է մասնավոր հատվածին։
