ԵՐԵՎԱՆ, 15 նոյեմբերի — Sputnik. Ռուսաստանը պատրաստ է «Իսլամական պետություն» արմատական խմբավորման և այլ ահաբեկչական խմբավորումների դեմ գործողությունները համակարգել ամերիկացիների գլխավորած կոալիցիայի հետ, հայտարարել է ՌԴ ԱԳՆ ղեկավար Սերգեյ Լավրովը:
«Ինչպես թուրքական ԶԼՄ-ներին տված հարցազրույցի ժամանակ հայտարարել էր նախագահ Պուտինը, մենք հերթական անգամ հաստատում ենք, որ Ռուսաստանի Դաշնությունը պատրաստ է ամերիկացիների գլխավորած կոալիցիայի հետ համատեղ համակարգել գործողությունները ԻՊ-ի և այլ ահաբեկչական խմբավորումների դեմ պայքարում», — Վիեննայում ընթացող բազմակողմանի բանակցությունների արդյունքներն ամփոփող ասուլիսի ընթացքում ասել է Ռուսաստանի արտգործնախարարը:
ՌԴ նախագահ Վլադիմիր Պուտինը Ռուսաստանի և Թուրքիայի ԶԼՄ-ներին տված հարցազրույցների ժամանակ ասել էր, թե Մոսկվան հույս ունի, որ ԱՄՆ-ի գլխավորած միջազգային կոլաիցիայի հետ ռազմափորձագիտական սերտ համագործակցություն կիրականացնի «Իսլամական պետության» դեմ պայքարում: Սակայն պատասխան արձագանքը բավականին զուսպ էր. Վաշինգտոնը չարձագանքեց նաև ռազմաօդային օդանավերի անձնակազմին փրկելու մասին հատուկ համաձայնագիր ստորագրելու առաջարկին:
